ಮೈಸೂರು : ದಸರಾ ಮಹೋತ್ಸವ ಸಂಪನ್ನವಾಗಿದ್ದು, ಪ್ರವಾಸೋದ್ಯಮಕ್ಕೆ ನಾಡಹಬ್ಬ ಹೊಸ ಚೈತನ್ಯ ತಂದು ಸರಕಾರದ ಶಕ್ತಿ ಯೋಜನೆ, ಸಾಲು ಸಾಲು ರಜೆಗಳ ಕಾರಣದಿಂದ ಈ ಬಾರಿ ಮೈಸೂರು ದಸರೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಹರಿದು ಕೆಎಸ್‌ಆರ್‌ಟಿಸಿಗೆ ಶೇ.35 ರಷ್ಟು ಹೆಚ್ಚುವರಿ ಆದಾಯ ಬಂದಿದೆ. 2022 ರಲ್ಲಿ ಕೆಎಸ್‌ಆರ್‌ಟಿಸಿಗೆ 2.70 ಕೋಟಿ ರೂ. ಆದಾಯ ಬಂದಿತ್ತು. ಕಳೆದ ಬಾರಿ ಅದು 5 ಕೋಟಿ ರೂ.ಗೆ ಏರಿಕೆ ಕಂಡಿತ್ತು. ಈ ಬಾರಿ ಶೇ.35 ರಷ್ಟು ಆದಾಯ ಹೆಚ್ಚಳವಾಗಿದ್ದು, ಕೆಎಸ್‌ಆರ್‌ಟಿಸಿಗೆ ದುಪ್ಪಟ್ಟು ಆದಾಯ ಬಂದಿದೆ.
ದಸರಾ ಮಹೋತ್ಸವದ ಅಂಗವಾಗಿ 10 ದಿನಗಳ ಕಾಲ ಮೈಸೂರಿನಲ್ಲಿ ನಾನಾ ಸಾಂಸ್ಕೃತಿಕ ಕಾರ‍್ಯಕ್ರಮಗಳನ್ನು ಏರ್ಪಡಿಸಿ ದೀಪಾಲಂಕಾರಗಳಿಂದ ಮೈಸೂರನ್ನು ಸಿಂಗರಿಸಲಾಗಿತ್ತು. ಅರಮನೆ, ಮೃಗಾಲಯ, ಚಾಮುಂಡಿಬೆಟ್ಟಕ್ಕೆ ಹೆಚ್ಚಿನ ಪ್ರವಾಸಿಗರು ಆಗಮಿಸಿ ಕೆಎಸ್‌ಆರ್‌ಟಿಸಿ ಬಸ್‌ಗಳನ್ನು ಪ್ರವಾಸಿಗರು ಹೆಚ್ಚು ಅವಲಂಬಿಸಿದ್ದರಿಂದ ಹೆಚ್ಚಿನ ಲಾಭ ಗಳಿಸಿದ್ದಾರೆ.
ಸಾಮಾನ್ಯವಾಗಿ ಮೈಸೂರು ಸುತ್ತಮುತ್ತ ಜಿಲ್ಲೆಗಳಿಂದ ಪ್ರತಿದಿನ 4 ಲಕ್ಷ ಪ್ರವಾಸಿಗರು ಓಡಾಟ ನಡೆಸುತ್ತಿದ್ದು, ದಸರಾ ವೇಳೆ 6.5 ರಿಂದ 7 ಲಕ್ಷದಷ್ಟು ಜನರು ಸಂಚಾರ ಮಾಡಿದ್ದಾರೆ. 2.5ರಿಂದ 3 ಲಕ್ಷದಷ್ಟು ಜನರು ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಮೈಸೂರಿಗೆ ಆಗಮಿಸಿದ್ದಾರೆ.
ಪ್ರಮುಖ ಧಾರ್ಮಿಕ ಕೇಂದ್ರವಾದ ಚಾಮುಂಡಿಬೆಟ್ಟ, ನಂಜನಗೂಡು, ಭಾಗಮಂಡಲ, ಶ್ರೀರಂಗಪಟ್ಟಣಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಆಗಮಿಸಿ ದೇವರ ದರ್ಶನ ಪಡೆದಿದ್ದಾರೆ. ದಸರಾ ಸಂದರ್ಭದಲ್ಲಿ ಬಳಕೆಯಾದ ವಾಹನಗಳಲ್ಲಿ ಶೇ.64 ರಷ್ಟು ಮಹಿಳೆಯರು ಹಾಗೂ ಶೇ. 36 ರಷ್ಟು ಪುರುಷರು ಕೆಎಸ್‌ಆರ್‌ಟಿಸಿ ಸೇವೆ ಬಳಸಿಕೊಂಡಿದ್ದಾರೆ. ಅದರಲ್ಲಿಯೂ ಮೈಸೂರು, ಸುತ್ತಮುತ್ತಲ ಜಿಲ್ಲೆ, ದಕ್ಷಿಣ ಹಾಗೂ ಉತ್ತರ ಕರ್ನಾಟಕದಿಂದಲೂ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಬಂದಿದ್ದಾರೆ.
ವಿಶೇಷವೆಂದರೆ ಈ ಬಾರಿ ಉತ್ತರ ಕರ್ನಾಟಕದ ಬಳ್ಳಾರಿ, ಹಾವೇರಿ, ವಿಜಯಪುರ, ರಾಯಚೂರು ಸೇರಿದಂತೆ ಹಲವು ಜಿಲ್ಲೆಗಳಿಂದ ಜನರು ಹೆಚ್ಚಾಗಿ ಬಂದಿದ್ದಾರೆ. ಮಹಿಳೆಯರು ತಮ್ಮ ಜೊತೆ ಮಕ್ಕಳನ್ನು ಕರೆದುತಂದು ದಸರಾ ಸಂಭ್ರಮ ಸವಿದಿದ್ದಾರೆ. ಸಾಲುಸಾಲು ರಜೆ ಹಾಗೂ ವಾರಾಂತ್ಯವಿದ್ದ ಕಾರಣ ಮೈಸೂರಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಹರಿದು ಬಂದಿದ್ದಾರೆ. ಅ.11 ರಂದು ಆಯುಧಪೂಜೆ, 12 ರಂದು ವಿಜಯದಶಮಿ, 13 ರಂದು ಭಾನುವಾರ ಇದ್ದ ಕಾರಣ ಮೈಸೂರಿಗೆ ಜನಸಾಗರವೇ ಹರಿದು ಬಂದಿತ್ತು. ಹೆಚ್ಚುವರಿ ಬಸ್‌ಗಳನ್ನು ಬಿಟ್ಟಿದ್ದರಿಂದ ಸಾರ್ವಜನಿಕರು ಅದರ ಸದ್ಬಳಕೆಯನ್ನೂ ಮಾಡಿಕೊಂಡಿದ್ದಾರೆ. ಮೈಸೂರು ಗ್ರಾಮಾಂತರ ವಿಭಾಗದಿಂದ 400, ಬೆಂಗಳೂರು ವಿಭಾಗದಿಂದ 300 ಸೇರಿ ಒಟ್ಟು 700 ಬಸ್‌ಗಳ ಕಾರ್ಯಾಚರಣೆ ನಡೆಸಿದ್ದವು.
ಈ ಬಾರಿ ದಸರೆಯು ಕೆಎಸ್‌ಆರ್‌ಟಿಸಿಗೆ ಹೊಸ ಬೂಸ್ಟ್‌ ನೀಡಿದೆ. ‘ಶಕ್ತಿ’ ಯೋಜನೆ ಪರಿಣಾಮ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಮೈಸೂರಿಗೆ ಬಂದಿದ್ದರು. ಕಳೆದ ಬಾರಿಗಿಂತ ಈ ಬಾರಿ ಆದಾಯ ಕೂಡ ದುಪ್ಪಟ್ಟಾಗಿದೆ ಎಂದು ಕೆಎಸ್‌ಆರ್‌ಟಿಸಿ ನಗರ ವಿಭಾಗೀಯ ನಿಯಂತ್ರಣಾಧಿಕಾರಿ ಎಚ್‌.ಟಿ.ವೀರೇಶ್‌ ತಿಳಿಸಿದ್ದಾರೆ.
