ಬೆಂಗಳೂರು: ಆನ್‌ಲೈನ್‌ ಬುಕ್ಕಿಂಗ್‌ ಸೈಟ್‌ನಲ್ಲಿ ತೋರಿಸಲಾಗುವ ಡ್ಯಾಶ್‌ಬೋರ್ಡ್‌ ಮೂಲಕ ಭಕ್ತರಿಗೆ ಲಭ್ಯವಾಗಲಿದೆ. ಆನ್‌ಲೈನ್‌ ವ್ಯವಸ್ಥೆ ಜಾರಿಗೆ ಬರಲಿದೆ ಎಂದು ಜಿಲ್ಲಾಧಿಕಾರಿ ಎಸ್‌.ಪ್ರೇಮ್‌ ಕೃಷ್ಣನ್‌, ಶಬರಿಮಲೆ ಎಡಿಎಂ ಅರುಣ್‌ ಎಸ್‌.ನಾಯರ್‌ ತಿಳಿಸಿದ್ದಾರೆ.
ಸನ್ನಿಧಾನದಲ್ಲಿ ಭಕ್ತರ ನಿಬಿಡತೆ, ವೇಳಾಪಟ್ಟಿ ಮತ್ತು ಇತರ ವ್ಯವಸ್ಥೆಗಳ ಮಾಹಿತಿಯನ್ನು ಆನ್‌ಲೈನ್‌ನಲ್ಲಿ ತಿಳಿಸಲಾಗುವುದು. ಇದು ಆನ್‌ಲೈನ್‌ ಬುಕ್ಕಿಂಗ್‌ ಸೈಟ್‌ನಲ್ಲಿ ತೋರಿಸಲಾಗುವ ಡ್ಯಾಶ್‌ಬೋರ್ಡ್‌ ಮೂಲಕ ಭಕ್ತರಿಗೆ ಲಭ್ಯವಾಗಲಿದೆ.
ಪತ್ತನಂತಿಟ್ಟ ಜಿಲ್ಲಾಡಳಿತ ಇದನ್ನು ಅನುಷ್ಠಾನಗೊಳಿಸಲಿದೆ. ಸನ್ನಿಧಾನದ ಸ್ಥಿತಿ ಗತಿ ಏನೆಂಬುದು ಜನಸಾಮಾನ್ಯರಿಗೂ ಅರ್ಥವಾಗುವ ರೀತಿ ಮಾಹಿತಿ ನೀಡಲಾಗುವುದು. ದಟ್ಟಣೆ ಸಾಧ್ಯತೆಯನ್ನು ಮುಂದಾಗಿ ಊಹಿಸಿ ಬೇಕಾದ ವ್ಯವಸ್ಥೆ ಮಾಡಿಕೊಳ್ಳಲಾಗುವುದು.
ಪ್ರತಿ ದಿನದ ಬುಕ್ಕಿಂಗ್‌ ಸಂಖ್ಯೆ ಮತ್ತು ದಟ್ಟಣೆ ಸ್ಥಿತಿ ಗತಿಗಳನ್ನು ಡ್ಯಾಶ್‌ಬೋರ್ಡ್‌ ತಿಳಿಸಲಿದೆ. ಪೊಲೀಸ್ ಮತ್ತು ಇತರ ಉದ್ಯೋಗಿಗಳಿಗೂ ದಟ್ಟಣೆ ದಿನಗಳನ್ನು ಮುಂದಾಗಿ ತಿಳಿದು ಹೆಚ್ಚಿನ ಸಿಬ್ಬಂದಿ ನಿಯೋಜನೆ ಮತ್ತು ಪಾರ್ಕಿಂಗ್‌ ಸೌಲಭ್ಯಗಳ ಸಿದ್ಧತೆ ಮಾಡಲು ಸಾಧ್ಯವಾಗುವುದು. ಜನಸಂದಣಿ ಇಲ್ಲದ ದಿನಗಳನ್ನು ಮುಂಚಿತವಾಗಿ ತಿಳಿದು ಭಕ್ತರು ಬುಕ್ಕಿಂಗ್‌ ಮಾಡಬಹುದು. ಆದರೆ ಆನ್‌ಲೈನ್‌ನಲ್ಲಿ ಬುಕ್‌ ಮಾಡುವವರ ಹೆಸರು, ಮಾಹಿತಿ ಡ್ಯಾಶ್‌ ಬೋರ್ಡ್‌ನಲ್ಲಿ ಕಾಣಿಸದು.
ಮಲಯಾಳಂ, ಕನ್ನಡ, ಇಂಗ್ಲಿಷ್‌, ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳನ್ನು ಚಾಟ್‌ ಬೋಟ್‌ ಬೆಂಬಲಿಸಲಿದೆ. ಚಾಟ್‌ ಬೋಟ್‌ ವಾಟ್ಸ್‌ಆ್ಯಪ್‌ ಸಂಖ್ಯೆ, ಕ್ಯೂಆರ್‌ ಕೋಡ್‌ ಅನ್ನು ಶೀಘ್ರದಲ್ಲೇ ಸಾರ್ವಜನಿಕರಿಗೆ ಲಭ್ಯವಾಗುವಂತೆ ಮಾಡಲಾಗುವುದು. ಈ ಎರಡೂ ಯೋಜನೆಗಳು ಈ ವಾರದಲ್ಲೆ ಚಾಲ್ತಿಗೆ ಬರಲಿದೆ ಎಂದು ಪತ್ತನಂತಿಟ ಜಿಲ್ಲಾಧಿಕಾರಿ ಎಸ್‌.ಪ್ರೇಮ್‌ ಕೃಷ್ಣನ್‌ ತಿಳಿಸಿದ್ದಾರೆ.
ಮಂಡಲ- ಮಕರಜ್ಯೋತಿ ಯಾತ್ರೆಗೆ ಶಬರಿಮಲೆ ಶ್ರೀ ಅಯ್ಯಪ್ಪ ದೇಗುಲ ನವೆಂಬರ್ 15 ರಂದು ಸಂಜೆ 5 ಗಂಟೆಗೆ ತೆರೆಯಲಿದೆ. ತಂತ್ರಿ ಕಂಠಾರ್‌ ರಾಜೀವರ್‌ ಮತ್ತು ಕಂಠಾರ್‌ ಬ್ರಹ್ಮದತ್ತ ಉಪಸ್ಥಿತಿಯಲ್ಲಿ ಸನ್ನಿಧಾನದ ಪ್ರಸ್ತುತ ಪ್ರಧಾನ ಅರ್ಚಕ ಪಿ.ಎನ್‌.ಮಹೇಶ್‌ ದೀಪ ಬೆಳಗಿಸಿ ಅಯ್ಯಪ್ಪ ಸ್ವಾಮಿಗೆ ಭಕ್ತರ ಉಪಸ್ಥಿತಿಯ ಕುರಿತು ತಿಳಿಸುವರು.
ಬಳಿಕ ಮಾಳಿಗಪ್ಪುರಂ ದೇಗುಲ ತೆರೆಯಲು ಪ್ರಸ್ತುತ ಪ್ರಧಾನ ಅರ್ಚಕ ಪಿ.ಜಿ.ಮುರಳಿ ಅವರಿಗೆ ಕೀಲಿ ಕೈ ಮತ್ತು ಭಸ್ಮ ನೀಡಲಾಗುವುದು. ಬಳಿಕ 18 ಮೆಟ್ಟಿಲಿಳಿದು ಕುಂಡಕ್ಕೆ ಅಗ್ನಿ ಸ್ಪರ್ಷ ನೀಡಲಾಗುವುದು. ಆ ಬಳಿಕ ಭಕ್ತರಿಗೆ 18 ಮೆಟ್ಟಿಲೇರಿ ಅಯ್ಯಪ್ಪ ದರ್ಶನಕ್ಕೆ ಅನುಮತಿ ನೀಡಲಾಗುವುದು.
ಶಬರಿಮಲೆ ಯಾತ್ರೆಗೆ ಸಂಬಂಧಿಸಿದ ಪ್ರಶ್ನೆಗಳು ಮತ್ತು ಅನುಮಾನಗಳಿಗೆ ಉತ್ತರಿಸಲು ವಾಟ್ಸ್‌ಆ್ಯಪ್‌ ಚಾಟ್‌ ಬೋಟ್‌ ವ್ಯವಸ್ಥೆ ಜಾರಿಗೆ ಬರಲಿದೆ. ಎಐ ಆಧರಿಸಿ ಕಾರ್ಯಾಚರಿಸುವ ಈ ವ್ಯವಸ್ಥೆಯಲ್ಲಿ ಎಲ್ಲಅನುಮಾನಗಳಿಗೆ ಕೂಡಲೆ ತಕ್ಕ ಉತ್ತರ ಸಿಗಲಿದೆ.
ಶಬರಿಮಲೆಗೆ ಭೇಟಿ ನೀಡುವ ಸಂದರ್ಭದಲ್ಲಿ ಕೆಎಸ್‌ಆರ್‌ಟಿಸಿ ವೇಳಾಪಟ್ಟಿ, ಹತ್ತಿರದ ಬಸ್‌ ನಿಲ್ದಾಣ, ರೈಲು ನಿಲ್ದಾಣ, ದೇವಸ್ಥಾನಗಳು, ಹೋಟೆಲ್‌ಗಳು, ವಸತಿ ಕೇಂದ್ರಗಳು ಸಹಿತ ಎಲ್ಲ ಪ್ರಶ್ನೆಗಳಿಗೆ ವಾಟ್ಸ್‌ಆ್ಯಪ್‌ ಚಾಟ್‌ ಬೋಟ್‌ ಉತ್ತರ ನೀಡುವುದು.
