ರೋಗಗಳಿಂದ ಕಂಗೆಟ್ಟಿದ್ದ ಮಲೆನಾಡಿನ ರೈತರಲ್ಲಿ ಆಶಾಕಿರಣ: ಭರವಸೆ ಮೂಡಿಸಿದ ಮಂಗಳ ಅಡಕೆ

ಶೃಂಗೇರಿ: ಹಳದಿ ಎಲೆ. ಬೇರು ಹುಳ, ಎಲೆ ಚುಕ್ಕಿ ರೋಗ ಹೀಗೆ ಮಲೆನಾಡಿನ ಅಡಕೆ ಬೆಳೆಗಾರರು ಕಳೆದ ಕೆಲವು ವರ್ಷಗಳಿಂದ ಸಾಲು ಸಾಲು ರೋಗ ಬಾಧೆಗಳಿಂದ ಹೈರಾಣಾಗಿದ್ದಾರೆ. ಅವರಿಗೆ ದಕ್ಷಿಣ ಕನ್ನಡ ಭಾಗದಲ್ಲಿ ಹೆಚ್ಚಾಗಿ ಬೆಳೆಯುವ ಮಂಗಳ ತಳಿ ಅಡಕೆ ಭರವಸೆ ಮೂಡಿಸಿದೆ.

ಅಡಕೆ ಬೆಳೆಗೆ ವ್ಯಾಪಕವಾಗಿ ಹರಡುತ್ತಿರುವ ಹಳದಿ ಎಲೆ, ಎಲೆ ಚುಕ್ಕಿ ರೋಗದ ನಡುವೆಯೂ ಕರಾವಳಿ ಭಾಗದಲ್ಲಿ ಜನಪ್ರಿಯವಾಗಿರುವ ಇಂಟರ್‌ಸಿ ಮಂಗಳ ತಳಿ ಮಲೆನಾಡಿನಲ್ಲಿ ಯಶಸ್ಸು ಕಾಣುತ್ತಿದೆ.

ಸುತ್ತಲೂ ಹಳದಿ ಎಲೆ ರೋಗ ಪೀಡಿತ ಅಡಕೆ ತೋಟಗಳ ಸಮೀಪ ಹೊಸದಾಗಿ ನಾಟಿ ಮಾಡಿರುವ ಇಂಟರ್‌ಸಿ ಮಂಗಳ ತಳಿ ತೋಟವನ್ನು ಹಸಿರಾಗಿ ಕಂಗೊಳಿಸುವಂತೆ ಮಾಡಿದೆ.

ಈ ಬೆಳವಣಿಗೆ ಮಲೆನಾಡಿನ ರೈತರಿಗೆ ಆಶಾದಾಯಕವಾಗಿದೆ. ಮೆಣಸೆ ಗ್ರಾಮ ಪಂಚಾಯಿತಿಯ ಮಸಿಗೆ ಗ್ರಾಮದ ಹನಕೋಡು ಶಾರದಾ ಮತ್ತು ನೆಮ್ಮಾರ್‌ ಗ್ರಾಮ ಪಂಚಾಯಿತಿಯ ನಾಯನಾಡಿನ ಶ್ರೀಧರ ಬುಕುಡಿಬೈಲಿನಲ್ಲಿ ನಾಟಿ ಮಾಡಿರುವ ತೋಟದಲ್ಲಿ ಈಗ ಫಸಲು ಬರುತ್ತಿದೆ.

ಕರಾವಳಿ ಭಾಗದ ಅಮಾವಾಸೆಬೈಲಿನಲ್ಲಿ ಉತ್ತಮ ಫಸಲು ನೀಡುತ್ತಿದ್ದ ಇಂಟರ್‌ಸಿ ಮಂಗಳ ತೋಟದಿಂದ ಅಡಕೆ ಸಸಿ ತಂದು ಪ್ರಾಯೋಗಿಕವಾಗಿ ನೆಡಲಾಗಿತ್ತು.

ಸಾಂಪ್ರಾದಾಯಿಕ ಅಡಕೆ ತಳಿಗಿಂತಲೂ ಚುರುಕಾಗಿ ಬೆಳವಣಿಗೆ ಕಂಡ ಇಂಟರ್‌ಸಿ ಮಂಗಳ ಆರೋಗ್ಯಕರವಾಗಿ ಬೆಳೆದಿದ್ದು, ನಿರೀಕ್ಷೆಗೂ ಮುನ್ನ ನಾಲ್ಕನೇ ವರ್ಷಕ್ಕೆ ಸಿಂಗಾರ (ಹೂವು) ಬೀಸಿತ್ತು. ಸ್ಥಳಿಯ ತಳಿ ಅಡಕೆ ಹೂವು ಬಿಡಲು ಕನಿಷ್ಠ 8 ವರ್ಷವಾದರೂ ಅಗತ್ಯವಿದೆ.

ಮಂಗಳ ತಳಿ ಅಡಕೆ ಮರಗಳು ಆರೋಗ್ಯಕರವಾಗಿದ್ದು, ಹಸಿರಿನಿಂದ ಕಂಗೊಳಿಸುತ್ತಿವೆ. ಹಳದಿ ಎಲೆ ರೋಗ ಇದುವರೆಗೂ ಕಾಣಿಸಿಕೊಳ್ಳದಿದ್ದರೂ, ಎಲೆ ಚುಕ್ಕಿ ರೋಗ ಕಳೆದ ಮೂರು ವರ್ಷದಿಂದ ಈ ಬೆಳೆಗೂ ಬಂದಿದೆ. ಸದೃಢವಾಗಿರುವ ಅಡಕೆ ಮರ ರೋಗವನ್ನು ತಡೆದುಕೊಳ್ಳುವ ಶಕ್ತಿ ಹೊಂದಿದೆ.

ಫಸಲು ನಷ್ಟವಾದರೂ ಅಡಕೆ ಮರ ಆರೋಗ್ಯದಾಯಕವಾಗಿದೆ. 2022-23ನೇ ಸಾಲಿನಲ್ಲಿ ಎಲೆ ಚುಕ್ಕಿ ರೋಗ ಹೆಚ್ಚಾಗಿದ್ದರೂ, ಪಕ್ಕದ ಸಾಂಪ್ರದಾಯಿಕ ಅಡಕೆ ತೋಟದಲ್ಲಿ ಬಹುತೇಕ ಮರಗಳು ರೋಗದಿಂದ ನಿರ್ನಾಮವಾದರೂ ಇಂಟರ್‌ಸಿ ಮಂಗಳ ತಳಿ ರೋಗವನ್ನು ತಡೆದುಕೊಂಡು ಮತ್ತೆ ಬೆಳವಣಿಗೆ ವೇಗ ಪಡೆದುಕೊಂಡಿದೆ.

ನಾಲ್ಕನೇ ವರ್ಷದಿಂದ ಪೈರು ಆರಂಭವಾಗುವುದರಿಂದ ರೈತರಿಗೂ ಬೇಗ ಆದಾಯ ದೊರಕುತ್ತದೆ. ಒಂದು ಮರದಲ್ಲಿ 5ರಿಂದ 8 ಕೊನೆ ಬಿಡುತ್ತಿದ್ದು, ಸ್ಥಳೀಯ ದೇಶಿ ಅಡಕೆಗಿಂತ ಗಾತ್ರದಲ್ಲಿ ದೊಡ್ಡದಿದೆ. ಕೊನೆಯಲ್ಲಿ ಅಡಕೆ ಕಾಯಿ ಸಂಖ್ಯೆ ಸಾಂಪ್ರದಾಯಿಕ ತಳಿಯಷ್ಟು ಇಲ್ಲದಿದ್ದರೂ, ಉತ್ತಮ ಫಸಲು ಪಡೆಯಬಹುದೆಂಬುದು ಬೆಳೆದಿರುವ ರೈತರ ಆಶಾಭಾವ.

“ಕ್ವಿಂಟಲ್‌ಗಟ್ಟಲೆ ಅಡಕೆ ಬೆಳೆಯುತ್ತಿದ್ದ ನಮ್ಮ ಮನೆಯಲ್ಲಿ ಈಗ ಇಳುವರಿ ಕೆಜಿ ಲೆಕ್ಕಕ್ಕೆ ಇಳಿದಿದೆ. ಅಡಕೆ ತೋಟದಲ್ಲಿ ಮರಗಳೆಲ್ಲ ನಾಶವಾಗಿ, ಅಲ್ಲೊಂದು ಇಲ್ಲೊಂದು ಉಳಿದಿವೆ.

7 ವರ್ಷದ ಹಿಂದೆ ಪ್ರಾಯೋಗಿಕವಾಗಿ 200 ಇಂಟರ್‌ಸಿ ಮಂಗಳ ತಳಿಯ ಸಸಿ ನಾಟಿ ಮಾಡಿದ್ದೆ.

ನಾಲ್ಕನೇ ವರ್ಷದಿಂದ ಕೆಲವು ಮರದಲ್ಲಿ ಫಸಲು ಬಂದಿದ್ದು, ಈಗ ಬಹುತೇಕ ಎಲ್ಲ ಮರದಲ್ಲೂ ಕೊನೆ ಬಂದಿವೆ. ಕಾಳು ಮೆಣಸು ಬೆಳೆಸಲು ಸಹಾಯಕವಾಗಿದೆ” ಎಂದು ಶೃಂಗೇರಿಯ ಹನಕೋಡು ಶಾರದಾ ತಿಳಿಸಿದ್ದಾರೆ.