ರಾಮ ಮಂದಿರಕ್ಕೆ 28 ಲಕ್ಷ ದೀಪಗಳಿಂದ ಅಲಂಕಾರ : ಗಿನ್ನೆಸ್ ದಾಖಲೆ ಹೊಂದುವ ಗುರಿ

ರಾಮ ಮಂದಿರ ತಲೆಯತ್ತಿದ ನಂತರ ಮೊದಲ ದೀಪಾವಳಿ ಇದಾಗಿದ್ದು, ಅಯೋಧ್ಯೆಯು 8ನೇ ದೀಪೋತ್ಸವಕ್ಕೆ ಸಜ್ಜಾಗಿದೆ.
ಉತ್ತರ ಪ್ರದೇಶದಲ್ಲಿ 8ನೇ ದೀಪೋತ್ಸವ ಕಾರ್ಯಕ್ರಮ ಯಶಸ್ವಿಗೊಳಿಸಲು ಪೂರ್ವ ಸಿದ್ಧತೆ ಕೈಗೊಂಡಿದೆ.
ಸರಯೂ ನದಿ ತಟದಲ್ಲಿ 28 ಲಕ್ಷ ದೀಪಗಳನ್ನು ಬೆಳಗುವ ಮೂಲಕ ಹೊಸ ಗಿನ್ನೆಸ್‌ ವಿಶ್ವದಾಖಲೆ ಹೊಂದುವ ಗುರಿಯನ್ನು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಸರಕಾರ ಹೊಂದಿದೆ.
ಲೇಸರ್‌, ಧ್ವನಿ ಮತ್ತು ಡ್ರೋನ್‌ ಶೋ ಕೂಡ ನಡೆಯಲಿದೆ. ಇಡೀ ನಗರವು ವಿದ್ಯುತ್‌ ದೀಪಗಳಿಂದ ಝಗಮಗಿಸಲಿದೆ.
ಮ್ಯಾನ್ಮಾರ್‌, ನೇಪಾಳ, ಥಾಯ್ಲೆಂಡ್‌, ಮಲೇಷ್ಯಾ, ಕಾಂಬೋಡಿಯಾ, ಇಂಡೋನೇಷ್ಯಾದ ಕಲಾವಿದರಿಂದ ನಾನಾ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ಈ ದೇಶಗಳಲ್ಲಿರುವ ರಾಮಾಯಣಗಳ ಪ್ರಸ್ತುತಿ ನಡೆಯಲಿದೆ. ಉತ್ತರಾಖಂಡದ ರಾಮಲೀಲಾ ಪ್ರದರ್ಶನವೂ ಇರಲಿದೆ ಎಂದು ತಿಳಿಸಿದ್ದಾರೆ.
ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ ಈ ಬಾರಿಯ ದೀಪಾವಳಿಗೆ ಚೀನಾ ತಯಾರಿತ ದೀಪಗಳ ಹಾಗೂ ಅಲಂಕಾರಿಕ ವಸ್ತುಗಳನ್ನು ಬಳಸದಿರಲು ನಿರ್ಧರಿಸಿ ಸ್ಥಳೀಯ ಕುಶಲಕರ್ಮಿಗಳಿಗೆ ಉತ್ತೇಜಿಸಿದ್ದಾರೆ.
ಈ ಬಾರಿಯ ದೀಪೋತ್ಸವ ಅದ್ವಿತೀಯ ಹಾಗೂ ಅದ್ಭುತವಾಗಿರುತ್ತದೆ ಎಂದು ರಾಮ ಮಂದಿರ ಪ್ರಧಾನ ಅರ್ಚಕ ಆಚಾರ್ಯ ಸತ್ಯೇಂದ್ರ ದಾಸ್‌ ಹೇಳಿದ್ದಾರೆ.
28 ಲಕ್ಷ ದೀಪ: ಅಕ್ಟೋಬರ್‌ 30ರ ಗುರುವಾರದಂದು ಸರಯೂ ನದಿ ತಟದ ಸ್ನಾನ ಘಟ್ಟಗಳ ಮೇಲೆ ಬೆಳಗುವ ಹಣತೆಗಳ ಸಂಖ್ಯೆ
1.50 ಲಕ್ಷ ‘ಗೋ ದೀಪ’: ಗೋವಿನ ಉತ್ಪನ್ನಗಳಿಂದ ತಯಾರಿಸಲಾದ ಪರಿಸರ ಸ್ನೇಹಿ 1.50 ಲಕ್ಷ ಹಣತೆಗಳನ್ನು ಬೆಳಗುವ ಕಾರ್ಯಮಕ್ಕೆ ಪಶು ಸಂಗೋಪನಾ ಇಲಾಖೆ ಕೈಜೋಡಿಸಿದೆ
30,000: ಸ್ವಯಂ ಸೇವಕರ ನಿಯೋಜನೆ. ಸ್ವಯಂ ಸೇವಕರಿಗೆ ವಿಶೇಷ ಟಿ-ಶರ್ಟ್‌, ಗುರುತಿನ ಚೀಟಿ, ಕ್ಯೂ ಆರ್‌ ಕೋಡ್‌ ಕ್ಯಾಪ್‌ಗಳ ವಿತರಣೆ
20 ಸ್ಥಳಗಳಲ್ಲಿ ಎಲ್‌ಇಡಿ ಪರದೆ: ಅಯೋಧ್ಯೆ ಜನತೆ ದೀಪೋತ್ಸವದ ಸಂಭ್ರಮವನ್ನು ಕಣ್ತುಂಬಿಕೊಳ್ಳಲು 20 ಸ್ಥಳಗಳಲ್ಲಿ ಎಲ್‌ಇಡಿ ಪರದೆಗಳನ್ನು ಸ್ಥಳೀಯ ಆಡಳಿತ ಅಳವಡಿಸಿದೆ.
10,000: ನಗರದ ಭದ್ರತೆಗೆ ನಿಯೋಜನೆಗೊಂಡಿರುವ ಭದ್ರತಾ ಸಿಬ್ಬಂದಿ. 17 ಮಾರ್ಗಗಳಲ್ಲಿ ಬಿಗಿ ಬಂದೋಬಸ್ತ್‌ ಕೈಗೊಳ್ಳಲಾಗಿದೆ.