ಹೊಸದಿಲ್ಲಿ : ಮೊರಾರ್ಜಿ ದೇಸಾಯಿಂದ ಹಿಡಿದು ನರೇಂದ್ರ ಮೋದಿಯವರೆಗೆ ಎಂಟು ಪ್ರಧಾನಮಂತ್ರಿಗಳು ವಿದೇಶಿ ಸಂಸತ್ ನಲ್ಲಿ ಭಾಷಣವನ್ನು ಮಾಡಿದ್ದಾರೆ. ಇದರಲ್ಲಿ ಮೋದಿಯವರು ಅತಿಹೆಚ್ಚು ಬಾರಿ ಭಾಷಣ ಮಾಡಿದ ಖ್ಯಾತಿಗೆ ಪಾತ್ರರಾಗಿದ್ದಾರೆ. ಮೊರಾರ್ಜಿ ದೇಸಾಯಿ ಮೊದಲ ಬಾರಿಗೆ ವಿದೇಶದಲ್ಲಿ ಭಾಷಣವನ್ನು ಮಾಡಿದ್ದರು.
ವಿದೇಶಿ ಸಂಸತ್ ನಲ್ಲಿ ಅತಿಹೆಚ್ಚು ಭಾಷಣ ಮಾಡಿದ ಭಾರತದ ಪ್ರಧಾನಮಂತ್ರಿಗಳ ಪೈಕಿ, ಹಾಲೀ ಪ್ರಧಾನಿ ನರೇಂದ್ರ ಮೋದಿ ಅಗ್ರಸ್ಥಾನಕ್ಕೆ ಏರಿದ್ದಾರೆ.
ಮೂರು ರಾಷ್ಟ್ರಗಳ ಪ್ರವಾಸದಲ್ಲಿರುವ ಪ್ರಧಾನಿ ಮೋದಿ, ಸದ್ಯ ದಕ್ಷಿಣ ಅಮೆರಿಕಾದ ಗಯಾನದಲ್ಲಿದ್ದಾರೆ. ಐವತ್ತು ವರ್ಷಗಳ ನಂತರ ಭಾರತದ ಪ್ರಧಾನಿಯೊಬ್ಬರು ಅಲ್ಲಿಗೆ ಹೋಗುತ್ತಿರುವುದು ಇದೇ ಮೊದಲು.
ಕಳೆದ ಬುಧವಾರ (ನ 20) ಮೋದಿಗೆ ಅಲ್ಲಿನ ಅತ್ಯುನ್ನತ ಆರ್ಡರ್ ಆಫ್ ಎಕ್ಸಲೆನ್ಸ್ ಪ್ರಶಸ್ತಿಯನ್ನು ಅಲ್ಲಿನ ರಾಷ್ಟ್ರಪತಿ ಮೊಹಮ್ಮದ್ ಇರ್ಫಾನ್ ಆಲಿ ನೀಡಿದ್ದರು.
ಪ್ರಧಾನಿ ಮೋದಿಯವರ ಅಮೆರಿಕಾದ ಸಂಸತ್ ಅನ್ನು ಉದ್ದೇಶಿಸಿ 2016 ಮತ್ತು 2023ರಲ್ಲಿ ಎರಡು ಬಾರಿ ಭಾಷಣ ಮಾಡಿದ್ದರು. ಅದಕ್ಕೂ ಮುನ್ನ ಫಿಜಿ, ಆಸ್ಟ್ರೇಲಿಯಾ ಮತ್ತು ಬ್ರಿಟನ್ ಸಂಸತ್ ನಲ್ಲೂ ಭಾಷಣವನ್ನು ಮಾಡಿದ್ದರು.
ಇದಲ್ಲದೇ, ಮಾರಿಸಸ್, ಉಗಾಂಡ, ಭೂತಾನ್, ನೇಪಾಳ, ಶ್ರೀಲಂಕಾ, ಮಂಗೋಲಿಯಾ, ಅಪಘಾನಿಸ್ತಾನ ಮತ್ತು ಮಾರಿಸಸ್ ದೇಶದ ಶಾಸಕಾಂಗ ಸಭೆಯನ್ನು ಉದ್ದೇಶಿಸಿ ಮೋದಿ ಮಾತನಾಡಿದ್ದರು. ಇದುವರೆಗೆ, 14 ಬಾರಿ ವಿದೇಶಿ ಸಂಸತ್ ನಲ್ಲಿ ಭಾಷಣ ಮಾಡಿದ ಹಿರಿಮೆ ಮೋದಿಯವರದ್ದಾಗಿದೆ.
ಕಾಮನ್ವೆಲ್ತ್ ಆಫ್ ಡೊಮಿನಿಕಾ ದೇಶ ಕೂಡಾ ಮೋದಿಯರಿಗೆ ಇದೇ ವಾರದಲ್ಲಿ ಡೊಮಿನಿಕಾ ಅವಾರ್ಡ್ ಆಫ್ ಹಾನರ್ ನೀಡಿ ಗೌರವಿಸಿತ್ತು. ಕೋವಿಡ್ ಸಮಯದಲ್ಲಿ ಮೋದಿಯವರ ಕೆಲಸವನ್ನು ಗೌರವಿಸಿ ಈ ಪ್ರಶಸ್ತಿಯನ್ನು ಅಲ್ಲಿನ ಸರ್ಕಾರ ನೀಡಿದೆ.
ವಿದೇಶಿ ನೆಲದಲ್ಲಿ ಭಾರತದ ಪ್ರಾತಿನಿಧ್ಯವನ್ನು ಸ್ಥಾಪಿಸಲು ಮೋದಿಯವರ ವಿದೇಶಿ ಪ್ರವಾಸ ಸಾಕಷ್ಟು ಪರಿಣಾಮವನ್ನು ಬೀರಿದೆ ಎಂದು ವಿದೇಶಿ ಪತ್ರಿಕೆಗಳು ಬಣ್ಣಿಸಿವೆ. ಮೋದಿಯವರ ನಂತರ ವಿದೇಶಿ ಸಂಸತ್ ನಲ್ಲಿ ಅತಿಹೆಚ್ಚು ಭಾಷಣ ಮಾಡಿದವರೆಂದರೆ ಮಾಜಿ ಪ್ರಧಾನಿ ಡಾ. ಮನ್ಮೋಹನ್ ಸಿಂಗ್.
2014ರಲ್ಲಿ ಪ್ರಧಾನಿಯಾದ ನಂತರ ಮೋದಿ, ಮೊದಲ ಬಾರಿಗೆ ಆಸ್ಟ್ರೇಲಿಯಾದಲ್ಲಿ ನಂತರ ಫಿಜಿ ದೇಶದ ಸಂಸತ್ ನಲ್ಲಿ ಭಾಷಣವನ್ನು ಮಾಡಿದರು. ಇದಾದ ನಂತರ 2015ರಲ್ಲಿ ಬ್ರಿಟನ್ ಸಂಸತ್ ಅನ್ನು ಉದ್ದೇಶಿಸಿಯೂ ಮೋದಿ ಭಾಷಣವನ್ನು ಮಾಡಿದ್ದರು.
