ಶಿವಮೊಗ್ಗ: ಈಗಿನ ಮಾರುಕಟ್ಟೆಯಲ್ಲಿ ಹಾಲು ಉತ್ಪಾದಕರ ಸಹಕಾರ ಸಂಘಗಳ ಒಕ್ಕೂಟಗಳನ್ನು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿಸಿದೆ. ಕಳೆದ ವರ್ಷದ ಹಾಲಿನ ದರ ಪರಿಷ್ಕರಣೆ, ಕ್ಷೀರಭಾಗ್ಯ ಯೋಜನೆ, ಮಾರುಕಟ್ಟೆಯಲ್ಲಿ ಹಾಲಿನ ಪೌಡರ್‌ ದರ ಕುಸಿತದ ಪರಿಣಾಮವಾಗಿ ರಾಜ್ಯದ 15 ಹಾಲು ಒಕ್ಕೂಟಗಳಲ್ಲಿ 9 ಒಕ್ಕೂಟಗಳು ನಷ್ಟದ ಕೂಪದಲ್ಲಿ ಬಿದ್ದಿವೆ. ಪರಿಸ್ಥಿತಿ ಇದೇ ರೀತಿ ಇನ್ನೊಂದು ವರ್ಷ ಮುಂದುವರಿದಲ್ಲಿ ಸಣ್ಣ ಒಕ್ಕೂಟಗಳಿಗೆ ಬೀಗಬಿದ್ದರೂ ಅಚ್ಚರಿ ಇಲ್ಲ.
ರಾಜ್ಯ ಸರಕಾರವು 2023ನೇ ಆಗಸ್ಟ್‌ನಲ್ಲಿ ಗ್ರಾಹಕರ ಹಾಲಿನ ದರವನ್ನು ಲೀಟರ್‌ಗೆ 3 ರೂ. ಹೆಚ್ಚಿಸಿ ಪೂರ್ಣ ದರವನ್ನು ಉತ್ಪಾದಕರಿಗೆ ವರ್ಗಾಯಿಸಲು ಆದೇಶಿಸಿದ್ದು ಹಾಲು ಉತ್ಪಾದಕರ ಸಹಕಾರ ಸಂಘಗಳ ಒಕ್ಕೂಟಗಳು ನಷ್ಟದ ಕೂಪಕ್ಕೆ ಬೀಳಲು ಕಾರಣವಾಯಿತು.
ಗ್ರಾಹಕರಿಗೆ ಹೆಚ್ಚಿಸಲಾದ 3 ರೂ. ದರವು ಮಾರಾಟವಾಗುವಂತಹ 52ರಿಂದ 54 ಲಕ್ಷ ಲೀಟರ್‌ಗೆ ಮಾತ್ರ ಸಿಗುತ್ತದೆ. ಉಳಿಕೆಯಾಗುವ 38ರಿಂದ 39 ಲಕ್ಷ ಲೀಟರ್‌ ಹಾಲಿಗೆ ಹೆಚ್ಚುವರಿಯಾದ 3 ರೂ. ದರವನ್ನು ಹಾಲು ಒಕ್ಕೂಟಗಳು ಭರಿಸಬೇಕಾಗಿದೆ. ರಾಜ್ಯದ 15 ಹಾಲು ಒಕ್ಕೂಟಗಳಲ್ಲಿ ಪ್ರತಿದಿನ ಸರಾಸರಿ 90ರಿಂದ 93 ಲಕ್ಷ ಲೀಟರ್‌ ಹಾಲು ಉತ್ಪಾದನೆಯಾಗುತ್ತಿದೆ. ಆದರೆ, ಪ್ರತಿದಿನ ಮಾರುಕಟ್ಟೆಗಳಲ್ಲಿ 52ರಿಂದ 54 ಲಕ್ಷ ಲೀಟರ್‌ ಹಾಲು ಮಾರಾಟವಾಗುತ್ತದೆ. ಪ್ರತಿದಿನ 38ರಿಂದ 39 ಲಕ್ಷ ಲೀಟರ್‌ ಹಾಲು ಉಳಿಕೆಯಾಗುತ್ತದೆ.
ಉತ್ಪಾದನೆಗಿಂತಲೂ ಅಧಿಕ ಮಾರಾಟ ಹೊಂದಿರುವ ದಕ್ಷಿಣ ಕನ್ನಡ ಹಾಲು ಒಕ್ಕೂಟ 4 ಕೋಟಿ ರೂ.ಗಳಿಗಿಂತ ಅಧಿಕ ಲಾಭದಲ್ಲಿದ್ದರೆ, ಧಾರವಾಡ, ಬೆಳಗಾವಿ, ವಿಜಯಪುರ ಮತ್ತು ಕಲಬುರಗಿ ಒಕ್ಕೂಟಗಳು ಲಾಭ ನಷ್ಟ ಇಲ್ಲದೆ ಸರಿದೂಗಿಸಿಕೊಂಡು ಹೋಗುತ್ತಿವೆ. ಮಾರಾಟ ಕಡಿಮೆ ಇದ್ದರೂ ತುಮಕೂರು ಒಕ್ಕೂಟ 2 ಕೋಟಿ ರೂ. ಲಾಭದಲ್ಲಿದೆ. ಆದರೆ, ಅತಿ ಹೆಚ್ಚು ಹಾಲಿನ ಉತ್ಪಾದನೆ ಮತ್ತು ಕಡಿಮೆ ಮಾರಾಟ ಇರುವಂತಹ ಬೆಂಗಳೂರು, ಹಾಸನ, ಕೋಲಾರ, ಮಂಡ್ಯ, ಮೈಸೂರು, ಶಿವಮೊಗ್ಗ, ಚಾಮರಾಜನಗರ ಮತ್ತು ಹಾವೇರಿ ಹಾಲು ಒಕ್ಕೂಟಗಳು ನಷ್ಟಕ್ಕೆ ಸಿಲುಕಿವೆ.
1 ಕೆ.ಜಿ. ಹಾಲಿನ ಪೌಡರ್‌ ಉತ್ಪಾದನೆಗೆ 361 ರೂ. ವೆಚ್ಚವಾಗುತ್ತದೆ. ಕ್ಷೀರಭಾಗ್ಯ ಯೋಜನೆ (ಕೆ.ಜಿ.ಗೆ 325 ರೂ.)ಯಲ್ಲಿ 36 ರೂ. ನಷ್ಟವಾಗುತ್ತಿದೆ. ಮುಕ್ತ ಮಾರುಕಟ್ಟೆಯಲ್ಲಿ ಪೌಡರ್‌ ಧಾರಣೆ 220 ರೂ.ಗಳಿಗಿಂತ ಕಡಿಮೆ ಇರುವುದರಿಂದ ಹೊರಗೆ ಕಳುಹಿಸಲು ಆಗುತ್ತಿಲ್ಲ. ರಾಜ್ಯದಲ್ಲಿ ಮಾರಾಟವಾಗದೆ ಉಳಿಯುವ ಹಾಲು ಒಕ್ಕೂಟಗಳ ಪಾಲಿಗೆ ದೊಡ್ಡ ಹೊರೆಯಾಗಿದೆ. 38ರಿಂದ 39 ಲಕ್ಷ ಲೀಟರ್‌ ಹಾಲಿಗೆ ಪ್ರತಿದಿನ 1.14ರಿಂದ 1.17 ಕೋಟಿ ರೂ. ಪಾವತಿಸುವುದಲ್ಲದೆ ಹಾಲಿನ ಪುಡಿಯಾಗಿ ಪರಿವರ್ತಿಸುವಲ್ಲೂ ನಷ್ಟ ಅನುಭವಿಸುತ್ತಿವೆ.
“ಪ್ರತಿವರ್ಷ ಹಾಲಿನ ಸುಗ್ಗಿ ಸಮಯದಲ್ಲಿ ದರ ಕಡಿತ ಮಾಡಿ ಆವಕ ಕಡಿಮೆಯಾದ ಬಳಿಕ ಹೆಚ್ಚಳ ಮಾಡುವುದು ಒಕ್ಕೂಟಗಳಲ್ಲಿ ಸಂಪ್ರದಾಯ. ಈ ಬಾರಿ ತಡವಾಗಿ ಹಾಲಿನ ದರ ಕಡಿಮೆ ಮಾಡಲಾಗಿದೆ. ಇಷ್ಟಾಗಿಯೂ ಒಕ್ಕೂಟಗಳು ನಷ್ಟದಿಂದ ಹೊರಬರಲು ಸಾಧ್ಯವಿಲ್ಲ. ಗ್ರಾಹಕರ ಹಾಲಿನ ದರ ಪರಿಷ್ಕರಣೆ ಮಾಡಿ ಒಕ್ಕೂಟಗಳಿಗೆ ವರ್ಗಾಯಿಸದೆ ಹೋದಲ್ಲಿ ಆರ್ಥಿಕವಾಗಿ ಚೇತರಿಸಿಕೊಳ್ಳುವುದು ಸಾಧ್ಯವಿಲ್ಲ” ಶಿವಮೊಗ್ಗ ಹಾಲು ಒಕ್ಕೂಟದ ಅಧ್ಯಕ್ಷ ವಿದ್ಯಾಧರ್‌ ತಿಳಿಸಿದ್ದಾರೆ.
