ಮಂಗಳೂರು: ಕುದ್ರೋಳಿ ಗ್ರಾಮದ ಶ್ರೀ ಗೋಕರ್ಣನಾಥ ಕ್ಷೇತ್ರದಲ್ಲಿ ಮಂಗಳೂರು ದಸರಾ ಮಹೋತ್ಸವದ ವೈಭವದ ಶೋಭಾಯಾತ್ರೆ ಭಾನುವಾರ ಸಂಜೆ ನಡೆಯಿಸಲಾಯಿತು. ಆರಂಭದಲ್ಲಿ ಅಲಂಕೃತ ಕೊಡೆಗಳು, ಜಾನಪದ ಕಲಾ ತಂಡಗಳು, ಭಜನಾ ತಂಡ, ವಾದ್ಯ- ಬ್ಯಾಂಡ್‌ ತಂಡಗಳು ಸಾಗಿತು. ಬಳಿಕ ನಾರಾಯಣಗುರು, ಗಣಪತಿ, ಆದಿಶಕ್ತಿ, ನವದುರ್ಗೆ, ಶಾರದಾ ಮಾತೆಯ ಟ್ಯಾಬ್ಲೋ ಸಾಗಿ ಇದಾದ ಬಳಿಕ ನಗಾರಿ, ಗೊಂಡಡಕ್ಕೆ, ಕಹಳೆ, ಡೊಳ್ಳುಕುಣಿತ, ಕಂಗೀಲು, ಸಮಲ ವಾದನ, ತಮಟೆ ವಾದನ, ವೀರಗಾಸೆ, ಹಗಲು ವೇಷ, ಕುರುಬರ ಡೊಳ್ಳು ತಂಡ ಸೇರಿದಂತೆ ನಾನಾ ರಾಜ್ಯ, ಜಿಲ್ಲೆಗಳ ಕಲಾತಂಡಗಳು ಭಾಗವಹಿಸಿ 70ಕ್ಕೂ ಮಿಕ್ಕಿದ ಸ್ತಬ್ಧಚಿತ್ರಗಳ ಜತೆಗೆ ದೇವಿಯರ ವಿಗ್ರಹಗಳು, ವೇಷಭೂಷಣಗಳು, ಹುಲಿವೇಷ, ಅನಾರ್ಕಲಿ, ನಾನಾ ದೇವಸ್ಥಾನಗಳು, ಸಂಘ ಸಂಸ್ಥೆಗಳ ಸ್ತಬ್ಧಚಿತ್ರಗಳು, ನಾನಾ ರಾಜ್ಯಗಳ ಕಲಾ ತಂಡಗಳು, ಬ್ಯಾಂಡ್‌ ತಂಡಗಳು ಗಮನ ಸೆಳೆಯಿತು.
ಇದಾದ ಬಳಿಕ ಶಿವಫ್ರೆಂಡ್ಸ್‌, ಗ್ರೀನ್‌ಪಾರ್ಕ್ ಫ್ರೆಂಡ್ಸ್‌ ಕುದ್ರೋಳಿ, ಜೂನಿಯರ್‌ ಬಾಯ್‌್ಸ, ಬಲ್ಲಾಳ್‌ಬಾಗ್‌ ಫ್ರೆಂಡ್ಸ್‌, ಸತ್ಯಸಾರಮನಿ, ಯುವಸಂಗಮ್‌ ಕುದ್ರೋಳಿ, ಬಿರುವೆರ್‌ ಕುಡ್ಲ, ಕುಡ್ಲಬ್ರದರ್ಸ್ ಪಾಂಡೇಶ್ವರ, ಪಾದುವಾ ಫ್ರೆಂಡ್ಸ್‌, ಬಲಿಪ ಫ್ರೆಂಡ್ಸ್‌, ತುಳುನಾಡ ಬಿರುವೆರ್‌ ಸುರತ್ಕಲ್‌, ಜವನೆರ್‌ ಕುಡ್ಲ ಉರ್ವ, ಕುಡ್ಲ ಫ್ರೆಂಡ್ಸ್‌ ಉರ್ವ , ರೈಸಿಂಗ್‌ ಫ್ರೆಂಡ್ಸ್‌ ಮಠದಕಣಿ, ಟೀಮ್‌ ಅವತಾರ್‌ ಬಳ್ಳಾಲ್‌ ಬಾಗ್‌, ತುಳುನಾಡ ರಕ್ಷಣಾ ವೇದಿಕೆ, ಕಾಳಭೈರವ ಫ್ರೆಂಡ್ಸ್‌ ಬಜಾಲ್‌, ಕಾನ ಫ್ರೆಂಡ್ಸ್‌, ತುಳುನಾಡ ಟೈಗರ್ಸ್, ತುಳುನಾಡ ಪ್ರತಿಷ್ಠಾ ತಂಡಗಳು ಹುಲಿವೇಷ ಟ್ಯಾಬ್ಲೋ ಹಾಗೂ ನಾನಾ ಸ್ತಬ್ಧಚಿತ್ರ ಟ್ಯಾಬ್ಲೋಗಳಿಂದ ವೈಭವದ ಶೋಭಾಯಾತ್ರೆಯ ಮೆರುಗು ಹೆಚ್ಚಿಸಿತು.
ಶಾರದೆ ಟ್ಯಾಬ್ಲೋದ ಬಳಿಕ ಶೋಭಾಯಾತ್ರೆಯ ಮೊದಲ ಮರ್ಯಾದೆಯ ಮಂಜಲ್‌ಬೈಲ್‌ ತಂಡದ ಹುಲಿವೇಷ, 2ನೇ ಮರ್ಯಾದೆಯ ಕಾಳಿಚರಣ್‌ ತಂಡದ ಹುಲಿವೇಷ ಸಹಿತ ಸ್ತಬ್ಧಚಿತ್ರ, ಮೂರನೇ ಮರ್ಯಾದೆಯ ಬರ್ಕೆ ಫ್ರೆಂಡ್ಸ್‌ ತಂಡದ ಹುಲಿವೇಷ ಹಾಗೂ ಸ್ತಬ್ಧಚಿತ್ರ ಸಾಗಿತು.
ನವದುರ್ಗೆಯರ ಮೆರವಣಿಗೆಯ ಬಳಿಕ ಹಾಗೂ ಶಾರದೆಗೆ ವಿಶೇಷ ಪೂಜೆ ಸಲ್ಲಿಸಲಾಯಿತು. ಮಾಜಿ ಕೇಂದ್ರ ಸಚಿವ, ಕುದ್ರೋಳಿ ಕ್ಷೇತ್ರದ ಅಭಿವೃದ್ಧಿ ರೂವಾರಿ ಬಿ.ಜನಾರ್ದನ ಪೂಜಾರಿ ಮಾತನಾಡಿದರು. ಶಾರದಾ ಮಾತೆಯನ್ನು ಎತ್ತಿಕೊಂಡು ಮೆರವಣಿಗೆಗೆ ಅಣಿಗೊಳಿಸುವಾಗ ಭಕ್ತ ಸಮೂಹ ಜೈಕಾರ ಹಾಕಿದರು. ಶೋಭಾಯಾತ್ರೆಯು ಶ್ರೀಕ್ಷೇತ್ರದಿಂದ ಹೊರಟು ಕಂಬ್ಳಾ ರಸ್ತೆ, ಮಣ್ಣಗುಡ್ಡ ಮಾರ್ಗವಾಗಿ ಬ್ರಹ್ಮಶ್ರೀ ನಾರಾಯಣಗುರು ವೃತ್ತ, ಲಾಲ್‌ಭಾಗ್‌, ಬಲ್ಲಾಳ್‌ಭಾಗ್‌, ಪಿವಿಎಸ್‌ ಸರ್ಕಲ್‌, ನವಭಾರತ ಸರ್ಕಲ್‌, ಕೆಎಸ್‌ ರಾವ್‌ ರಸ್ತೆ, ಹಂಪನಕಟ್ಟೆ, ಕ್ಲಾಕ್‌ ಟವರ್‌ ವೃತ್ತದಿಂದ ಬಲಕ್ಕೆ ತಿರುಗಿ, ಗಣಪತಿ ಹೈಸ್ಕೂಲ್‌ ಮಾರ್ಗವಾಗಿ ಶ್ರೀವೆಂಕಟರಮಣ ದೇವಸ್ಥಾನದ ಮುಂಭಾಗದಿಂದ ಕಾರ್‌ಸ್ಟ್ರೀಟ್‌, ನ್ಯೂಚಿತ್ರಾ ಟಾಕೀಸ್‌, ಅಳಕೆಯಾಗಿ ಶ್ರೀಕ್ಷೇತ್ರಕ್ಕೆ ತೆರಳಿತು.
ಭರ್ಜರಿ ವ್ಯಾಪಾರ, ವಹಿವಾಟು: ಶೋಭಾಯಾತ್ರೆ ಸಾಗುವ ರಸ್ತೆಯ ಎರಡು ಬದಿಯಲ್ಲೂ ಭಾನುವಾರ ಮುಂಜಾನೆ ಹೊತ್ತಿಗಾಗಲೇ ವ್ಯಾಪಾರಿಗಳು ತಮ್ಮ ವ್ಯಾಪಾರದ ಜಾಗ ಗುರುತುಮಾಡಿಕೊಂಡು ವ್ಯಾಪಾರ, ವಹಿವಾಟಿಗೆ ಇಳಿದಿದ್ದರು.
ದಿನವಿಡೀ ಹೋಮ, ಪೂಜೆ: ಭಾನುವಾರ ಬೆಳಗ್ಗೆ 10ರಿಂದ ವಾಗೀಶ್ವರಿ ದುರ್ಗಾಹೋಮ, 12.30ಕ್ಕೆ ಶಿವಪೂಜೆ, ಸಂಜೆ 4ರಿಂದ ಶ್ರೀ ಶಾರದಾ ಮಾತೆಯ ಶೋಭಾಯಾತ್ರೆ ಆರಂಭ. ಅ.14ರಂದು ಪ್ರಾತಃಕಾಲ 4ರಿಂದ ಪೂಜೆ ಬಲಿ, ಮಂಟಪ ಬಲಿ, ಪ್ರಾತಃಕಾಲ ಮಂಟಪ ಪೂಜೆ ಬಳಿಕ ಶ್ರೀ ಶಾರದಾ ವಿಸರ್ಜನೆ, ಅವಭೃತ ಸ್ನಾನ ಸಾಗಲಿದೆ. ರಾತ್ರಿ 7ರಿಂದ 8ರ ತನಕ ಭಜನಾ ಕಾರ್ಯಕ್ರಮ, 8ರಿಂದ ಗುರುಪೂಜೆ ನಡೆಯಲಿದೆ.
