ಬೆಳಗಾವಿ: ಜಿಲ್ಲೆಯ ಸೋನಟ್ಟಿ ತಾಲೂಕಿನ ಶಾಲೆಯ ಬಡ ಮಕ್ಕಳನ್ನು ಶಿಕ್ಷಕರೊಬ್ಬರು ವಿಮಾನದಲ್ಲಿ ಶೈಕ್ಷಣಿಕ ಪ್ರವಾಸಕ್ಕೆ ಕರೆದುಕೊಂಡು ಹೋಗಿದ್ದಾರೆ.
ಸೋನಟ್ಟಿ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಕನ್ನಡ ಶಾಲೆಯ ವಿದ್ಯಾರ್ಥಿಗಳನ್ನು ಸಹ ಶಿಕ್ಷಕರಾದ ಪ್ರಕಾಶ ದೇಯನ್ನವರ ಅವರು ಸ್ವಂತ ಖರ್ಚಿನಲ್ಲಿ ವಿಮಾನಯಾನದ ಮೂಲಕ ಶೈಕ್ಷಣಿಕ ಪ್ರವಾಸಕ್ಕಾಗಿ ಹೈದ್ರಾಬಾದ್‌ಗೆ ಕರೆದೊಯ್ದಿದ್ದಾರೆ.
ವಿದ್ಯಾರ್ಥಿಗಳ ಶೈಕ್ಷಣಿಕ ಅಭಿವೃದ್ಧಿಗೆ ಶ್ರಮಿಸುತ್ತಿರುವ ಪ್ರಕಾಶ ದೇಯನ್ನವರ ತಮ್ಮ ಶಾಲೆಯ ಬಡ ಮಕ್ಕಳನ್ನು ವಿಮಾನಯಾನದ ಮೂಲಕ ಶೈಕ್ಷಣಿಕ ಪ್ರವಾಸಕ್ಕೆ ಕರೆದುಯೊಯ್ಯುವ ಮೂಲಕ ಮಾದರಿಯಾಗಿದ್ದಾರೆ.
ಶಿಕ್ಷಣ ಇಲಾಖೆಯ ಉಪನಿರ್ದೇಶಕಿ ಲೀಲಾವತಿ ಹಿರೇಮಠ, ಅಧಿಕಾರಿಗಳಾದ ಎಸ್‌.ಎಸ್‌ ನಾಗನೂರ, ಜಿ.ಎಸ್‌.ಕಂಬಳಿ, ಎಂ.ಎಸ್‌.ಮೇದಾರ ಇತರರ ಸಮ್ಮುಖದಲ್ಲಿಗುರುವಾರ 17 ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರಾದ ರತನ ಪಾಟೀಲ, ವಿದ್ಯಾ ಬಡಿಗೇರ, ಪ್ರಕಾಶ ಹುಲಮನಿ ಸೇರಿದಂತೆ ಒಟ್ಟು 21 ಸದಸ್ಯರ ತಂಡ ಬೆಳಗಾವಿ ವಿಮಾನ ನಿಲ್ದಾಣದ ಮೂಲಕ ಹೈದರಾಬಾದ್‌ಗೆ ತೆರಳಿತು.
ಇನ್ನು ಗುರುವಾರ ಬೆಳಗಾವಿಯ ವಿಮಾನ ನಿಲ್ದಾಣದಲ್ಲಿವಿದ್ಯಾರ್ಥಿಗಳ ತಂಡವನ್ನು ಡಿಡಿಪಿಐ ಲೀಲಾವತಿ ಹಿರೇಮಠ ಹಾಗೂ ಅಧಿಕಾರಿಗಳು ಬೀಳ್ಕೊಟ್ಟರು. ಈ ವಾರಾಂತ್ಯದಲ್ಲಿ ಅವರು ಪ್ರವಾಸ ಮುಗಿಸಿ ಭಾರತಕ್ಕೆ ಹಿಂದಿರುಗಲಿದ್ದಾರೆ.
ಕೆಲ ತಿಂಗಳುಗಳ ಹಿಂದೆ ಮಹಾರಾಷ್ಟ್ರದ ಗಡಿಗ್ರಾಮವಾದ ಅಕ್ಕಲಕೋಟ ತಾಲೂಕಿನ ಮೈಂದರ್ಗಿ ಜಿಪಂ ಕನ್ನಡ ಪ್ರಾಥಮಿಕ ಶಾಲೆಯ ಮುಖ್ಯಗುರು ಮಹಾಂತೇಶ ಅವರ ನೇತೃತ್ವದಲ್ಲಿ ಸುಮಾರು 35 ವಿದ್ಯಾರ್ಥಿನಿಯರು ವಿಮಾನದ ಮೂಲಕ ಮುಂಬಯಿಯಿಂದ ದೆಹಲಿಗೆ ಪ್ರಯಾಣ ಮಾಡಿದ್ದರು. ಈ ಶೈಕ್ಷಣಿಕ ಪ್ರವಾಸ ಗ್ರಾ ಮೀಣ ಮಕ್ಕಳು ವಿಮಾನ ಮೆಟ್ಟಿಲೇರಿ ಪ್ರವಾಸ ಮಾಡಿ ದಾಖಲೆ ಸೃಷ್ಟಿಸಿದ್ದರು.
ಸಾರಿಗೆ ಬಸ್, ಖಾಸಗಿ ವಾಹನಗಳು, ರೈಲುಗಳ ಮೂಲಕ ಮಕ್ಕಳನ್ನು ಶೈಕ್ಷಣಿಕ ಪ್ರವಾಸಕ್ಕೆ ಕರೆದೊಯ್ಯು ವುದು ಸಾಮಾನ್ಯ. ಆದರೆ ಮೈಂದರ್ಗಿ ಸರ್ಕಾರಿ ಶಾಲೆಯು ಕಳೆದ ಸತತ ಐದನೇ ಬಾರಿಗೆ ಮಕ್ಕಳನ್ನು ವಿಮಾನ ಮೂಲಕ ಪ್ರವಾಸ ಮಾಡಿಸಿ ಸಾಧನೆ ಮರೆದಿದ್ದಾರೆ.
