ಕೋಲಾರ: ತೀವ್ರ ರೋಗಬಾಧೆ ಹಾಗೂ ಕಳಪೆ ಸಸಿಗಳಿಂದ ಜಿಲ್ಲೆಯಲ್ಲಿ ಟೊಮೆಟೊ ಇಳುವರಿ ಭಾರಿ ಪ್ರಮಾಣದಲ್ಲಿ ಇಳಿಮುಖವಾಗಿದ್ದು, ಉತ್ತಮ ಬೆಲೆಯಿದ್ದರೂ ಬೆಳೆಯಿಲ್ಲದಂತಾಗಿದೆ. ಪರಿಣಾಮ, ಟೊಮೆಟೊ ಬೆಲೆ ಏರಿಕೆಯ ಲಾಭ ಜಿಲ್ಲೆಯ ರೈತರಿಗೆ ದೊರೆಯದಂತಾಗಿದೆ. ವಾರದ ಹಿಂದೆಯಷ್ಟೇ ಕೆಜಿಗೆ ರೂ.30-40ರಷ್ಟಿದ್ದ ಟೊಮೆಟೊ ಬೆಲೆ ಮೂರ್ನಾಲ್ಕು ದಿನಗಳಿಂದ ಸ್ಥಳೀಯ ಮಾರುಕಟ್ಟೆಯಲ್ಲಿ 70-80 ರೂ.ಗಳಂತೆ ಮಾರಟವಾಗುತ್ತಿದೆ. ಆದರೆ, ತೋಟದಲ್ಲಿ ಟೊಮೆಟೊ ಬೆಳೆಯಿಲ್ಲದ ಕಾರಣದಿಂದಾಗಿ ರೈತರು ಕೈ ಕೈ ಹಿಸುಕಿಕೊಳ್ಳುವಂತಾಗಿದೆ. ಕೋಲಾರ ಎಪಿಎಂಸಿ ಮಾರುಕಟ್ಟೆ ಹರಾಜಿನಲ್ಲಿ ಉತ್ತಮ ಗುಣಮಟ್ಟದ 15 ಕೆಜಿ ತೂಕದ ಬಾಕ್ಸ್‌ ಟೊಮೆಟೊ ಬೆಲೆ ಸಾವಿರ ಗಡಿ ದಾಟಿದೆ. ಆದರೆ, ತೀವ್ರ ರೋಗಬಾಧೆಯಿಂದ ಸಾವಿರ ಬಾಕ್ಸ್‌ ಸಿಗುವ ಜಾಗದಲ್ಲಿ 40 ಬಾಕ್ಸ್‌ ಟೊಮೆಟೊ ಸಿಗುವಂತಾಗಿದ್ದು, ರೈತರು ತೊಂದರೆ ಅನುಭವಿಸುವಂತಾಗಿದೆ.
ಕಳೆದ ಮೂರು ವರ್ಷಗಳಿಂದ ಕೋಲಾರ ಜಿಲ್ಲೆಯಲ್ಲಿ ಟೊಮೆಟೊ ಇಳುವರಿ ಸತತವಾಗಿ ಇಳಿಮುಖವಾಗುತ್ತಲೇ ಇದೆ. ಆದರೆ, ಸಮಸ್ಯೆ ನಿವಾರಣೆಗೆ ಸರಕಾರ ಯಾವುದೇ ಕ್ರಮಗಳನ್ನು ಕೈಗೊಳ್ಳದ ಕಾರಣದಿಂದಾಗಿ ಟೊಮೆಟೊ ಬೆಳೆ ರೈತರ ಪಾಲಿಗೆ ದುಬಾರಿಯಾಗಿ ಪರಿಗಣಿಸಿದೆ.
ಹವಾಮಾನ ವೈಪರೀತ್ಯ, ರೋಗಬಾಧೆ ಹಾಗೂ ಸಾಲು ಸಾಲು ಹಬ್ಬಗಳಿಂದಾಗಿ ಟೊಮ್ಯಾಟೊಗೆ ಎಲ್ಲೆಡೆ ಬೇಡಿಕೆ ಸೃಷ್ಟಿಯಾಗಿದೆ. ಆದರೆ, ಬೇಡಿಕೆ ತಕ್ಕಷ್ಟು ಇಳುವರಿ ಬರದ ಹಿನ್ನೆಲೆಯಲ್ಲಿ ಬೆಲೆ ಏರಿಕೆಯಾಗುತ್ತಿದ್ದು, ಇನ್ನೂ ಹದಿನೈದು ದಿನಗಳು ಉತ್ತಮ ಬೆಲೆ ಇರಲಿದೆ ಎಂದು ಹೇಳಲಾಗುತ್ತಿದೆ.
ಟೊಮೆಟೊ ಮಾರಾಟದಲ್ಲಿಏಷ್ಯಾದಲ್ಲೇ ಎರಡನೇ ಅತಿದೊಡ್ಡ ಮಾರುಕಟ್ಟೆ ಎನಿಸಿರುವ ಕೋಲಾರದ ಎಪಿಎಂಸಿಗೆ ಹೊರ ರಾಜ್ಯ ಹಾಗೂ ಹೊರ ಜಿಲ್ಲೆಗಳಿಂದ ಶೇ.60-70ರಷ್ಟು ಟೊಮೆಟೊ ಪೂರೈಕೆಯಾಗುತ್ತಿದೆ. ಆಂಧ್ರಪ್ರದೇಶ, ಚಿತ್ರದುರ್ಗ, ಚಳ್ಳಕೆರೆ, ಹಿರಿಯೂರು, ಮಂಡ್ಯ ಸೇರಿದಂತೆ ಬೇರೆಯಿಂದ ಹೆಚ್ಚಿನ ಪ್ರಮಾಣದಲ್ಲಿ ಟೊಮೆಟೊ ಬರುತ್ತಿದ್ದು, ಸ್ಥಳೀಯ ರೈತರಿಂದ ಬರುವ ಟೊಮೆಟೊ ಪ್ರಮಾಣ ಭಾರಿ ಪ್ರಮಾಣದಲ್ಲಿ ಇಳಿಮುಖವಾಗಿರುವುದು ಆತಂಕ ತಂದಿದೆ.
ಕಳಪೆ ಸಸಿ: ಗುಣಮಟ್ಟ ಕುಸಿತ ಜಿಲ್ಲೆಯಲ್ಲಿ ಈ ಬಾರಿ ನಾಟಿ ಮಾಡಿದ ಬೆಳೆಯಲ್ಲಿ ಶೇ.50ರಷ್ಟು ಹಾನಿಯಾಗಿದ್ದು, ಎಲೆ ಮುರುಟು ರೋಗ (ಬಿಳಿ ನೊಣ ಬಾಧೆ) ಸೇರಿದಂತೆ ನಾನಾ ರೋಗಗಳು ಬಾಧಿಸುತ್ತಿವೆ. ಕೆಲ ನರ್ಸರಿಗಳಿಂದ ವಿತರಣೆ ಆಗುತ್ತಿರುವ ಕಳಪೆ ಸಸಿಯಿಂದಲೂ ಇಳುವರಿ ತಗ್ಗಿದೆ. ಗೋಲಿ ಗಾತ್ರದಲ್ಲಿ ಕಾಯಿ ಕಾಣಿಸಿಕೊಂಡು ಉದುರಿ ಹೋಗುತ್ತಿವೆ. ಜತೆಗೆ ಗುಣಮಟ್ಟವೂ ತಗ್ಗುತ್ತಿದೆ. ಹವಾಮಾನದಲ್ಲಿ ಹಠಾತ್‌ ಬದಲಾವಣೆ ಪರಿಣಾಮ ಬೀರಿದೆ.
