ಯಾವುದೇ ಆಯ್ದ ಭಾಷೆಗಳಲ್ಲಿ ವಿಡಿಯೋಗಳ ವೀಕ್ಷಣೆ : ಯೂಟ್ಯೂಬ್

ಜನಪ್ರಿಯ ವೀಡಿಯೊ ಪ್ಲಾಟ್‌ಫಾರ್ಮ್ ಯೂಟ್ಯೂಬ್‌ನಲ್ಲಿ ಗೂಗಲ್ ಹೊಸ ವೈಶಿಷ್ಟ್ಯವೊಂದನ್ನು ಪರಿಚಯಿಸಿದೆ. ಈ ಹೊಸ ವೈಶಿಷ್ಟ್ಯವು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಸಹಾಯದಿಂದ ಯಾವುದೇ ಭಾಷೆಗೆ ವಿಡಿಯೋಗಳನ್ನು ಭಾಷಾಂತರಿಸಬಹುದು ಮತ್ತು ಡಬ್ ಮಾಡಬಹುದು.
ಟೆಕ್ ದೈತ್ಯ ಕಂಪನಿ ಗೂಗಲ್ ತನ್ನ ವಿಡಿಯೋ ಸ್ಟ್ರೀಮಿಂಗ್ ಪ್ಲಾಟ್‌ಫಾರ್ಮ್ ಯೂಟ್ಯೂಬ್‌ನಲ್ಲಿ ಹೊಸ ವೈಶಿಷ್ಟ್ಯವೊಂದನ್ನು ಪರಿಚಯಿಸಿದೆ. ಈ ವೈಶಿಷ್ಟ್ಯದ ಹೆಸರು ಆಟೋ ಡಬ್ಬಿಂಗ್. ಇದು ಎಐ ಅಂದರೆ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಸಹಾಯದಿಂದ ಕಾರ್ಯನಿರ್ವಹಿಸುತ್ತದೆ. ಯೂಟ್ಯೂಬ್​ನ ಹೊಸ ವೈಶಿಷ್ಟ್ಯದ ಸಹಾಯದಿಂದ ಪ್ರಪಂಚದ ಅನೇಕ ಭಾಷೆಗಳಲ್ಲಿ ವಿಡಿಯೋಗಳನ್ನು ಈಗ ಸುಲಭವಾಗಿ ವೀಕ್ಷಿಸಬಹುದಾಗಿದೆ.
ಈ ವೈಶಿಷ್ಟ್ಯದ ಸಹಾಯದಿಂದ ಯೂಟ್ಯೂಬ್​ ಆಟೋಮೆಟಿಕ್​ ಆಗಿ ವಿಡಿಯೋವನ್ನು ಒಂದು ಭಾಷೆಯಿಂದ ಇನ್ನೊಂದು ಭಾಷೆಗೆ ಅನುವಾದಿಸುತ್ತದೆ ಮತ್ತು ಡಬ್ ಮಾಡುತ್ತದೆ. ಯೂಟ್ಯೂಬ್​ನ ಈ ವೈಶಿಷ್ಟ್ಯವು ಎಐ ತಂತ್ರಜ್ಞಾನದ ಸಹಾಯದಿಂದ ಕಾರ್ಯನಿರ್ವಹಿಸುತ್ತದೆ. ಎಐ ಸಿಸ್ಟಮ್​ ಅದರ ಆಡಿಯೋದಿಂದ ಅಪ್‌ಲೋಡ್ ಮಾಡಿದ ವಿಡಿಯೋವನ್ನು ಗುರುತಿಸುತ್ತದೆ. ನಂತರ, ಸಿಸ್ಟಮ್ ಅನುವಾದ ಮತ್ತು ಡಬ್ಬಿಂಗ್ ಪ್ರಕ್ರಿಯೆಯನ್ನು ಪ್ರಾರಂಭಿಸುತ್ತದೆ. ವಿಡಿಯೋದಲ್ಲಿ ಬಳಸಲಾದ ಭಾಷೆಯನ್ನು ಬದಲಾಯಿಸಲಾಗುತ್ತದೆ ಮತ್ತು ನೀವು ಆಯ್ಕೆ ಮಾಡಿಕೊಂಡ ಭಾಷೆಗೆ ಪರಿವರ್ತಿಸಲಾಗುತ್ತದೆ. ಈ ವೈಶಿಷ್ಟ್ಯವು ಇನ್ನೂ ಹೊಸ ತಂತ್ರಜ್ಞಾನವನ್ನು ಆಧರಿಸಿದೆ, ಆದ್ದರಿಂದ ಆರಂಭಿಕ ಹಂತದಲ್ಲಿ ಅನುವಾದದಲ್ಲಿ ಕೆಲವು ದೋಷಗಳು ಇರಬಹುದು. ಆದರೆ ಈ ತಂತ್ರಜ್ಞಾನವು ಕಾಲಾನಂತರದಲ್ಲಿ ಗೂಗಲ್​ ಸುಧಾರಣೆ ಮಾಡುತ್ತಾ ಮುಂದೆ ಸಾಗುತ್ತದೆ.ಇದರರ್ಥ ನೀವು ಇಂಗ್ಲಿಷ್‌ ಭಾಷೆಯಲ್ಲಿ ವಿಡಿಯೋವನ್ನು ಅಪ್‌ಲೋಡ್ ಮಾಡಿದ್ರೆ, ಅದು ಫ್ರೆಂಚ್, ಜರ್ಮನ್, ಹಿಂದಿ, ಇಂಡೋನೇಷಿಯನ್, ಇಟಾಲಿಯನ್, ಜಪಾನೀಸ್, ಪೋರ್ಚುಗೀಸ್ ಮತ್ತು ಸ್ಪ್ಯಾನಿಷ್ ಭಾಷೆಗಳಲ್ಲಿ ಡಬ್ ಆಗುತ್ತದೆ. ನೀವು ಈ ಮೇಲಿನ ಯಾವುದೇ ಭಾಷೆಗಳಲ್ಲಿ ವಿಡಿಯೋವನ್ನು ಅಪ್‌ಲೋಡ್ ಮಾಡಿದ್ರೆ, ಅದು ಇಂಗ್ಲಿಷ್‌ಗೆ ಡಬ್ ಮಾಡುತ್ತದೆ. ಈ ವೈಶಿಷ್ಟ್ಯದ ದೊಡ್ಡ ಪ್ರಯೋಜನವೆಂದರೆ ಬಳಕೆದಾರರು ಈಗ ತಮ್ಮ ಆದ್ಯತೆಯ ಭಾಷೆಯಲ್ಲಿ ವಿಷಯವನ್ನು ಪಡೆಯುತ್ತಾರೆ. ಇದು ವಿಡಿಯೋವನ್ನು ಅರ್ಥಮಾಡಿಕೊಳ್ಳಲು ಸುಲಭವಾಗುತ್ತದೆ.
ಈ ವೈಶಿಷ್ಟ್ಯವು ಎಲ್ಲ ಬಳಕೆದಾರರಿಗೆ ಇನ್ನೂ ಲಭ್ಯವಿಲ್ಲ. ಪ್ರಸ್ತುತ, ಇದನ್ನು ಆಯ್ದ ಚಾನಲ್‌ಗಳಲ್ಲಿ ಹೊರತರಲಾಗಿದೆ. ಈ ವೈಶಿಷ್ಟ್ಯವು ನಿಮ್ಮ ಚಾನಲ್‌ಗೆ ಲಭ್ಯವಿದ್ದರೆ, ಸುಧಾರಿತ ಸೆಟ್ಟಿಂಗ್‌ಗಳಿಗೆ ಹೋಗುವ ಮೂಲಕ ನೀವು ಅದನ್ನು ಪರಿಶೀಲಿಸಬಹುದು. ವೈಶಿಷ್ಟ್ಯವನ್ನು ಆನ್ ಮಾಡಿದ ನಂತರ, ಡಬ್ ಮಾಡಿದ ವಿಡಿಯೋವನ್ನು ಪಬ್ಲಿಷ್​ ಮಾಡುವ ಮೊದಲು ಅದನ್ನು ಸರಿಯಾಗಿ ಡಬ್ ಮಾಡಲಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಲು ನೀವು ಅದನ್ನು ಮತ್ತೊಮ್ಮೆ ಪರಿಶೀಲಿಸಬಹುದು. ಬ್ಲಾಗ್ ಪೋಸ್ಟ್‌ವೊಂದರಲ್ಲಿ ಯೂಟ್ಯೂಬ್​ ಹೇಳಿಕೆ ಪ್ರಕಾರ, ಆಟೋ-ಡಬ್ ಒಂದು ಹೊಸ ತಂತ್ರಜ್ಞಾನವಾಗಿದೆ. ಇದು ಪರಿಪೂರ್ಣ ಆಗಿದೆ ಎಂದು ಹೇಳಲು ಸಾಧ್ಯವಿಲ್ಲ. ಡಬ್ಬಿಂಗ್‌ನ ನಿಖರತೆ ಮತ್ತು ಅಭಿವ್ಯಕ್ತಿಶೀಲತೆಯನ್ನು ಹೆಚ್ಚಿಸಲು ನಾವು Google DeepMind ಮತ್ತು Google Translate ಜೊತೆಗೆ ಸಹಕರಿಸುತ್ತಿದ್ದೇವೆ. ಮುಂಬರುವ ಅಪ್​ಡೇಟ್​ಗಳು ಕ್ರಿಯೆಟರ್ಸ್​ನ ಧ್ವನಿ ಮತ್ತು ಪರಿಸರವನ್ನು ಉತ್ತಮವಾಗಿ ಸೆರೆಹಿಡಿಯಲು ‘Expressive Speech’ ಅನ್ನು ಪರಿಚಯಿಸುತ್ತದೆ ಎಂದು ಕಂಪನಿ ಹೇಳಿದೆ