ಬೆಂಗಳೂರು: ಬೆಂಗಳೂರಿನ ಜಿಕೆವಿಕೆಯಲ್ಲಿ ನಡೆಯುತ್ತಿರುವ ಕೃಷಿಮೇಳದಲ್ಲಿ ಕೇಕ್, ಪಿಜ್ಜಾ, ಬರ್ಗರ್, ಬಿಸ್ಕತ್ ಹಾಗೂ ಬೇಕಿಂಗ್ ಉತ್ಪನ್ನಗಳನ್ನು ತಯಾರಿಸಿ ಗ್ರಾಹಕರಿಗೆ ನೀಡಲಾಯಿತು.
ನಗರದ ಹೆಬ್ಬಾಳದಲ್ಲಿರುವ ಗಾಂಧಿ ಕೃಷಿ ವಿಜ್ಞಾನ ಕೇಂದ್ರ (ಜಿಕೆವಿಕೆ)ದಲ್ಲಿ ನಡೆಯುತ್ತಿರುವ ‘ಕೃಷಿಮೇಳ’ದಲ್ಲಿ ಬೇಕಿಂಗ್ ತಂತ್ರಜ್ಞಾನ ಹಾಗೂ ಮೌಲ್ಯವರ್ಧನಾ ಸಂಸ್ಥೆಯಿಂದ ತಯಾರಿಸಲಾದ ಕೇಕ್, ಪಿಜ್ಜಾ, ಬರ್ಗರ್, ಬಿಸ್ಕತ್ ಸೇರಿದಂತೆ ಇನ್ನಿತರ ಬೇಕಿಂಗ್ ಉತ್ಪನ್ನಗಳನ್ನು ಖರೀದಿಸಿದ ಜನರು ಸವಿದು ಸಂಭ್ರಮಿಸಿದರು.
ಗುಣಮಟ್ಟದ ಹಾಗೂ ಉತ್ಕೃಷ್ಟ ಬೇಕಿಂಗ್ ತಿನಿಸುಗಳನ್ನು ಸಂಸ್ಥೆಯಿಂದ ತರಬೇತಿ ಪಡೆದ ಸಿಬ್ಬಂದಿ ಮೇಳದಲ್ಲಿಯೇ ತಯಾರಿಸಿ ಜನರ ಗಮನ ಸೆಳೆದರು. ಕೇಕ್ ತಯಾರಿಕೆಯ ಬಗ್ಗೆ ಮಾಹಿತಿ ನೀಡಿದರು.
ಬೇಕಿಂಗ್ ತಿನಿಸು ಹಾಗೂ ಅದರ ತಂತ್ರಜ್ಞಾನ ಬಳಕೆ ಸಾರ್ವಜನಿಕರಿಗೆ ಮಾಹಿತಿ ಮೇಳದಲ್ಲಿ ಮಾಹಿತಿ ನೀಡಲಾಯಿತು. 4 ಹಾಗೂ 14 ವಾರಗಳ ಪ್ರತ್ಯೇಕ ತರಬೇತಿ ನೀಡುವುದರ ಬಗ್ಗೆ ತಿಳುವಳಿಕೆ ಮೂಡಿಸಿರುವ ಹಿನ್ನೆಲೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ನೋಂದಣಿ ಮಾಡಿಕೊಳ್ಳುತ್ತಿರುವುದು ಕಂಡುಬಂತು.
“ಮನಸ್ಸಿದ್ದರೆ ಮಾರ್ಗ ಎಂಬಂತೆ ಸ್ವಂತ ಉದ್ಯಮ ಮಾಡಬೇಕೆಂಬ ಹಂಬಲವಿದ್ದವರಿಗೆ ಕಡಿಮೆ ಬಂಡವಾಳದಲ್ಲಿ ಹೆಚ್ಚು ಹಣ ಸಂಪಾದಿಸುವ ಉದ್ಯಮವಿದು. ನಿರುದ್ಯೋಗಿಗಳಿಗೆ ಆಸರೆಯಾದರೆ ಐಟಿಬಿಟಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಬಾಸ್ ಕೆಳಗೆ ಕೆಲಸ ಮಾಡುತ್ತಿರುವವರೂ ಸಹ ತಾವೇ ಯಾಜಮಾನವಾಗಲೂ ಈ ಉದ್ಯಮ ನೆರವಿಗೆ ಬರುತ್ತದೆ.
ಉತ್ಸಾಹದ ಜೊತೆಗೆ ಬೇಕಿಂಗ್ ತರಬೇತಿ ಪಡೆದರೆ ಭವಿಷ್ಯದಲ್ಲಿ ನೀವೇ ಹತ್ತಾರು ಜನರಿಗೆ ಬಾಸ್ ಆಗಬಹುದು. ಕೇಕ್ ತಯಾರಿಕೆ ಹಾಗೂ ಅಲಂಕಾರ, ಪಿಜ್ಜಾ, ಬರ್ಗರ್, ವಿವಿಧ ಬಿಸ್ಕತ್ಗಳು, ಪಪ್ಸ್, ದಿಲ್ ಪಸಂದ್ ಹಾಗೂ ಚಾಕಲೇಟ್ ತಯಾರಿಕೆ ಸೇರಿ ವಿವಿಧ ತಿನಿಸುಗಳು ಬಗ್ಗೆ ಹೇಳಿಕೊಡಲಾಗುತ್ತದೆ.
ಅಲ್ಲದೇ ಮೌಲ್ಯವರ್ಧಿತ ಆಹಾರಗಳಾದ ರಾಗಿ ತಯಾರಿಸಬಹುದಾದ ಉತ್ಪನ್ನ, ಪುಷ್ಠಿದಾಯಕ ಬ್ರೆಡ್ ಮತ್ತು ಬನ್ಗಳು, ಜೇನುತುಪ್ಪ ಆಧರಿತ ಬೇಕರಿ ವಸ್ತುಗಳೂ ಸೇರಿದಂತೆ 100ಕ್ಕೂ ಹೆಚ್ಚು ಉತ್ಪನ್ನಗಳ ಬಗ್ಗೆ ತರಬೇತಿ ನೀಡಲಾಗುತ್ತದೆ. ಅಲ್ಪಾವಧಿ ತರಬೇತಿಗೆ 3 ಸಾವಿರ ಹಾಗೂ ದೀರ್ಘಾವದಿ ತರಬೇತಿಗೆ 10 ಸಾವಿರ ಶುಲ್ಕ ವಿಧಿಸಲಾಗಿದೆ” ಎಂದು ತಿಳಿಸಿದರು.
ತರಬೇತಿ ಪಡೆದ ಬಳಿಕ ಉದ್ಯಮ ಆರಂಭಿಸುವವರಿಗೆ ಕೇಂದ್ರ ಸರ್ಕಾರದ ವಿವಿಧ ಯೋಜನೆಯಡಿಯಲ್ಲಿ ಯಂತ್ರ ಖರೀದಿಗೆ ಶೇ.50ರಷ್ಟು ಸಬ್ಸಿಡಿ ಪಡೆಯಲು ಮೌಲ್ಯವರ್ಧನಾ ಸಂಸ್ಥೆ ನೆರವು ನೀಡಲಿದೆ. ಉದ್ಯಮದಾರರ ಹಾಗೂ ಯಂತ್ರೋಪಕರಣಗಳ ಕಂಪೆನಿಗಳ ನಡುವೆ ಸೇತುವೆಯಾಗಿ ಕೆಲಸ ಮಾಡಲಿದೆ.
ಕನಿಷ್ಠ 50 ಸಾವಿರ ರೂಪಾಯಿ ಇದ್ದರೆ ಸಣ್ಣ ಮಟ್ಟದಿಂದ ಉದ್ಯಮ ಆರಂಭಿಸಬಹುದು. ಕುಶಲತೆಯ ಜೊತೆ ಬ್ರ್ಯಾಂಡಿಂಗ್ ಮಾಡುವ ಕಲೆಯನ್ನು ಹೇಳಿಕೊಡಲಾಗುವುದು. ಇದುವರೆಗೂ 40 ಸಾವಿರಕ್ಕೂ ಹೆಚ್ಚು ಮಂದಿಗೆ ತರಬೇತಿ ನೀಡಿದ್ದು, 20 ಸಾವಿರ ಮಂದಿಯನ್ನು ಉದ್ಯಮಶೀಲರನ್ನಾಗಿ ಮಾಡಿದ್ದೇವೆ ಎಂದು ತಿಳಿಸಿದರು.
