ಬೆಂಗಳೂರು ಬಿಬಿಎಂಪಿ: ಇ-ಖಾತಾ ಕುರಿತ ಸಮಸ್ಯೆಗಳಿಗೆ ಸಹಾಯವಾಣಿ ಬಿಡುಗಡೆ

ಬಿಬಿಎಂಪಿಯು ವೃತ್ತಿಪರ ಹಾಗೂ ಏಕ ಇ-ಖಾತಾ ನಾಗರೀಕ ಸಹಾಯವಾಣಿಯನ್ನು ಪ್ರಾರಂಭ ಮಾಡಿದೆ ಎಂದು ಬಿಬಿಎಂಪಿ ಮುಖ್ಯ ಆಯುಕ್ತರಾದ ತುಷಾರ್ ಗಿರಿನಾಥ್ ಹೇಳಿದ್ದಾರೆ.
ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ನಾಗರೀಕರಿಗೆ ಇ-ಖಾತಾ ಪಡೆಯಲು ಅನುಕೂಲವಾಗುವ ನಿಟ್ಟಿನಲ್ಲಿ, ವೃತ್ತಿಪರ, ಏಕ ಇ-ಖಾತಾ ನಾಗರೀಕ ಸಹಾಯವಾಣಿ 9480683695 ಪ್ರಾರಂಭಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಯಾರೇ ಲಂಚ ಕೇಳಿದರೆ ಅಥವಾ ವಿಳಂಬವಾದರೆ, ನಾಗರೀಕ ಸಹಾಯವಾಣಿಗೆ ಕರೆ ಮಾಡಿ ಎಂದು ಪಾಲಿಕೆ ತಿಳಿಸಿದೆ. ಇನ್ನು ನಾಗರೀಕರು ತಾವೇ ಆನ್‌ಲೈನ್‌ನಲ್ಲಿ ಇ-ಖಾತಾವನ್ನು ರಚಿಸಲು ಬಿಬಿಎಂಪಿ ಪ್ರೋತ್ಸಾಹಿಸುತ್ತದೆ ಎಂದಿದ್ದಾರೆ.
ಉಪ ಮುಖ್ಯಮಂತ್ರಿಗಳು ಹಾಗೂ ಬೆಂಗಳೂರು ನಗರಾಭಿವೃದ್ಧಿ ಸಚಿವರಾದ ಡಿ.ಕೆ ಶಿವಕುಮಾರ್ ನಿರ್ದೇಶನದಂತೆ ಸಾರ್ವಜನಿಕರಿಗೆ ಇ-ಖಾತಾಗಳು ಸುಗಮವಾಗಿ ಸಿಗುವುದನ್ನು ಖಚಿತಪಡಿಸಿಕೊಳ್ಳಲು, ಬಿಬಿಎಂಪಿಯು ತಕ್ಷಣದ ಕ್ರಮಗಳನ್ನು ಕೈಗೊಂಡಿದೆ.
1. ವೃತ್ತಿಪರ, ಏಕ ಇ-ಖಾತಾ ನಾಗರೀಕ ಸಹಾಯವಾಣಿಯನ್ನು ಪ್ರಾರಂಭ
eKhata Citizen Helpline – 9480683695
2. ಯಾರೇ ಲಂಚ ಕೇಳಿದರೆ ಅಥವಾ ವಿಳಂಬವಾದರೆ, ದಯವಿಟ್ಟು ನಾಗರೀಕ ಸಹಾಯವಾಣಿಗೆ ಕರೆ ಮಾಡಿ ಎಂದ ಪಾಲಿಕೆ
3. ನಾಗರೀಕರು ತಾವೇ ಆನ್‌ಲೈನ್‌ನಲ್ಲಿ ಇ-ಖಾತಾವನ್ನು ರಚಿಸಲು ಪ್ರೋತ್ಸಾಹಿಸಲಾಗುತ್ತದೆ.
https://BBMPeAasthi.karnataka.gov.in
ಕನ್ನಡ ಭಾಷೆ: https://youtu.be/JR3BxET46po, ಆಂಗ್ಲ ಭಾಷೆ: https://youtu.be/GL8CWsdn3wo ನಾಗರಿಕರು YouTube ತರಬೇತಿ ವೀಡಿಯೊಗಳನ್ನು ನೋಡಬಹುದು.
4. ಸಹಾಯಕ ಕಂದಾಯ ಅಧಿಕಾರಿ ಕಛೇರಿಗಳನ್ನು ನಾಗರೀಕರಿಗೆ ಸುಗಮವಾಗಿ ಇ-ಖಾತಾ ನೀಡಲು ವಿಸ್ತರಿಸಲಾಗಿದೆ:
I. 1000ಕ್ಕೂ ಅಧಿಕ ಹೆಚ್ಚುವರಿ ಕೇಸ್ ವರ್ಕರ್ ಲಾಗಿನ್‌ಗಳನ್ನು ನೀಡಲಾಗಿದೆ.
II. 200ಕ್ಕೂ ಅಧಿಕ ಹೆಚ್ಚುವರಿ ಸಹಾಯಕ ಕಂದಾಯ ಅಧಿಕಾರಿಗಳನ್ನು ನಿಯೋಜಿಸಲಾಗಿದೆ.
III. ಯಾರಿಂದಾದರೂ ಯಾವುದಾದರೂ ಅನಗತ್ಯ ವಿಳಂಬವಾದಲ್ಲಿ, ಪಾಲಿಕೆಯು ಕ್ರಮ ಕೈಗೊಳ್ಳುತ್ತದೆ ಮತ್ತು ನಾಗರೀಕರು ಬದಲಿ ಸಹಾಯಕ ಕಂದಾಯ ಅಧಿಕಾರಿ/ಕೇಸ್ ವರ್ಕರ್ ಗಳನ್ನು ಸಹ ಭೇಟಿ ನೀಡಬಹುದಾಗಿರುತ್ತದೆ.
ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಕಾಗದ ಆಧರಿತ ಸಾಂಪ್ರದಾಯಿಕ ಖಾತಾ ವ್ಯವಸ್ಥೆಯನ್ನು ಬದಲಿಸಿದ್ದು, ಇ-ಖಾತಾ ವ್ಯವಸ್ಥೆ ಜಾರಿಗೆ ತಂದಿದೆ. ಬಿಡಿಎ ಅಧಿಕಾರ ವ್ಯಾಪ್ತಿಯ ಎಲ್ಲಾಆಸ್ತಿಗಳು ಇ-ಖಾತಾ ವ್ಯವಸ್ಥೆಗೆ ಪರಿವರ್ತನೆಯಾಗಬೇಕು ಎಂದಿದೆ. ಈಗಾಗಲೇ ಕಾಗದ ಆಧರಿತ ಖಾತಾ ದಾಖಲೆಗಳನ್ನು ಹೊಂದಿರುವ ಆಸ್ತಿ ಮಾಲೀಕರು ಇ-ಖಾತೆಗೆ ತಕ್ಷಣ ಅರ್ಜಿ ಸಲ್ಲಿಸುವ ಅಗತ್ಯವಿಲ್ಲದಿದ್ದರೂ ಮಾರಾಟ, ಉಡುಗೊರೆ, ಮಾಲೀಕತ್ವ ವರ್ಗಾವಣೆ ಮಾಡುವ ಸಂದರ್ಭದಲ್ಲಿಇದು ಕಡ್ಡಾಯವಾಗುತ್ತದೆ.
ಬೆಂಗಳೂರಿನಲ್ಲಿ ಮನೆ ಖರೀದಿ ಮಾಡಲು ನಿರ್ಧರಿಸಿದವರು ಆ ಕುರಿತಾದ ಟೈಟಲ್ ಡೀಡ್‌ ಮತ್ತು ಖಾತೆ ಕುರಿತು ಅಗತ್ಯವಾಗಿ ತಿಳಿದುಕೊಂಡಿರಬೇಕು. ಟೈಟಲ್‌/ಶೀರ್ಷಿಕೆ ಪತ್ರವು ಮಾರಾಟಗಾರ ಮತ್ತು ಖರೀದಿದಾರರ ನಡುವಿನ ಲಿಖಿತ ಒಪ್ಪಂದವಾಗಿದ್ದು, ಆಸ್ತಿ ವರ್ಗಾವಣೆ ವೇಳೆ ಕಾನೂನು ಮಾಲೀಕತ್ವದ ಪುರಾವೆಯಾಗಿ ಆಸ್ತಿ ತೆರಿಗೆ ಲೆಕ್ಕಾಚಾರಕ್ಕೆ ಖಾತಾ ಅವಶ್ಯಕವಾಗಿದೆ. ಇ-ಖಾತಾ ಎಂದರೇನು ಮತ್ತು ಆನ್‌ಲೈನ್‌ ಮೂಲಕ ಪಂಚಾಯತ್‌ನಲ್ಲಿಇ-ಖಾತಾ ಪಡೆಯುವುದು ಹೇಗೆ ಎಂಬುದರ ವಿವರ ಇಲ್ಲಿದೆ.
ಖಾತಾ ಎಂದರೆ ಇಂಗ್ಲಿಷ್‌ನಲ್ಲಿ ಲೆಕ್ಕ ಎಂದರ್ಥ. ರಿಯಲ್ ಎಸ್ಟೇಟ್‌ ಪರಿಭಾಷೆಯ ಪ್ರಕಾರ ಇದು ಮಾಲೀಕರ ಹೆಸರು, ಆಸ್ತಿಯ ಸ್ಥಳ, ಆಸ್ತಿಯ ಆಯಾಮಗಳಂಥ ಮಾಹಿತಿಗಳಿರುವ ಕಾನೂನು ದಾಖಲೆಯಾಗಿದೆ. ಬೆಂಗಳೂರಿನಲ್ಲಿ ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯ ಮಾಲೀಕರ ಆಸ್ತಿಯ ಮೌಲ್ಯಮಾಪನವನ್ನು ಈ ದಾಖಲೆ ಪ್ರತಿನಿಧಿಸುತ್ತದೆ. ಆನ್‌ಲೈನ್‌ ಫೈಲ್ ಮಾಡಿದ ಖಾತಾವನ್ನು ಈಗ ಇ-ಖಾತಾ ಎಂದು ಉಲ್ಲೇಖಿಸಲಾಗಿದೆ. ಇದು ಗಣಕೀಕೃತ ಆವೃತ್ತಿಯಾಗಿದ್ದು, ಹಸ್ತಚಾಲಿತವಾಗಿ ರೆಕಾರ್ಡ್‌ ಮಾಡಲಾದ ಎಲ್ಲಾ ಮಾಹಿತಿ ಒಳಗೊಂಡಿರುತ್ತದೆ.
ಆಸ್ತಿ ಖರೀದಿ, ಮಾರಾಟ ಅಥವಾ ವರ್ಗಾವಣೆ ಸಂದರ್ಭದಲ್ಲಿ ಖಾತೆ ನಿರ್ಣಾಯಕ ದಾಖಲೆಯಾಗಿದೆ. ಖಾತಾಗಳಲ್ಲಿ ಎ ಖಾತಾ ಮತ್ತು ಬಿ ಖಾತಾ ಎಂಬ ಎರಡು ಪ್ರಮುಖ ವರ್ಗಗಳಿದ್ದು, ಪ್ರಸ್ತುತ ಆಸ್ತಿ ಸಂಬಂಧಿಸಿದಂತೆ ಎಲೆಕ್ಟ್ರಾನಿಕ್‌ ಖಾತಾ (ಇ-ಖಾತಾ) ಆನ್‌ಲೈನ್‌ನಲ್ಲಿ ಲಭ್ಯವಾಗಲಿದೆ. ಇದರಲ್ಲಿ ಮಾಲೀಕನ ಹೆಸರು, ಆಸ್ತಿಯ ಗಾತ್ರ, ಸ್ಥಳ, ಬಿಲ್ಡ್‌ಅಪ್‌ ಪ್ರದೇಶ ಮತ್ತಿತರ ಮಾಹಿತಿ ಇರುತ್ತದೆ. ಎಲ್ಲಕ್ಕಿಂತ ಹೆಚ್ಚಾಗಿ ಇದು ಆಸ್ತಿಯ ಅಧಿಕೃತ ತೆರಿಗೆದಾರರನ್ನು ಗುರುತಿಸುತ್ತದೆ ಮತ್ತು ತೆರಿಗೆ ಲೆಕ್ಕಾಚಾರ ಮಾಡುತ್ತದೆ. ಇದರಲ್ಲಿ ಪ್ರತಿ ಆಸ್ತಿಗೆ ಪಾವತಿ ಮಾಡಬೇಕಾಗುತ್ತದೆ. ಸರಕಾರದ ಆಸ್ತಿ ಪರಿಶೀಲನೆ ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ತಮ್ಮ ಆಸ್ತಿಗಳಿಗೆ ಆಸ್ತಿ ಮಾಲೀಕರು ಖಾತೆ ಮತ್ತು ಪಿಐಡಿ ಸಂಖ್ಯೆ ಪಡೆಯುತ್ತಾರೆ. ಆಸ್ತಿಗೆ ಸಂಬಂಧಿಸಿದ ಪ್ರಮಾಣಪತ್ರಗಳನ್ನು ಪಡೆಯುವ ಕೆಲಸವನ್ನು ಬಿಬಿಎಂಪಿ ಕೇಂದ್ರಗಳು ಮತ್ತು ಕಿಯೋಸ್ಕ್‌ಗಳು ಸರಳಗೊಳಿಸಿದ್ದು, ಇ-ಖಾತಾ ಇದರ ಭಾಗವಾಗಿದೆ. ಆದಾಗ್ಯೂ ಬಿ ಖಾತಾ ನೋಂದಣಿಯಡಿ ಪಟ್ಟಿ ಮಾಡಲಾದ ಬಹುತೇಕ ಆಸ್ತಿಗಳು ಇ-ಖಾತೆಗೆ ಅರ್ಹವಾಗಿಲ್ಲ. ಏಕೆಂದರೆ ಇವು ಮ್ಯಾನ್ಯುವಲ್‌ ದಾಖಲೆಗಳಾಗಿದ್ದು, ಇದರಲ್ಲಿ ಬಿಬಿಎಂಪಿ ಆಸ್ತಿ ಪರಿಶೀಲನೆ ಪ್ರಕ್ರಿಯೆ ಪೂರ್ಣಗೊಂಡಿರುವುದಿಲ್ಲ.
ಮೊದಲನೆಯದಾಗಿ ಬೆಂಗಳೂರು ಒನ್‌ ಕೇಂದ್ರಕ್ಕೆ ಭೇಟಿ ನೀಡಿ ಸ್ವತಃ ಅರ್ಜಿ ಸಲ್ಲಿಸಬಹುದು ಅಥವಾ ಪಿಐಡಿ ಸಂಖ್ಯೆ ಹೊಂದಿದ್ದರೆ ಸಕಾಲ ವೆಬ್‌ಸೈಟ್‌ನಲ್ಲಿಆನ್‌ಲೈನ್‌ನಲ್ಲಿಇ-ಖಾತಾಗೆ ಅರ್ಜಿ ಸಲ್ಲಿಸಬಹುದು. ಆನ್‌ಲೈನ್‌ ಇ-ಖಾತಾ ಅರ್ಜಿ ಭರ್ತಿ ಮಾಡಿ ಮಾರಾಟ ಪತ್ರ, ಎನ್‌ಕಂಬರೆನ್ಸ್‌ ಸರ್ಟಿಫಿಕೇಟ್‌, ಐಡಿ ಕಾರ್ಡ್‌ ಮತ್ತಿತರ ಅಗತ್ಯ ದಾಖಲೆಗಳನ್ನು ಲಗತ್ತಿಸಬೇಕು. ಈ ಪ್ರಕ್ರಿಯೆ ಬಳಿಕ ಸಕಾಲ ಸ್ವೀಕೃತಿ ಸಂಖ್ಯೆ ಪಡೆದು ಡಿಜಿಟಲ್‌ ಸಹಿ ಪಡೆದು ಇ-ಖಾತಾವನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಅರ್ಜಿ ಸಲ್ಲಿಕೆಯಲ್ಲಿ ವ್ಯತ್ಯಾಸವಾದರೆ ಅಧಿಕಾರಿಯೊಬ್ಬರು ನಿಮ್ಮನ್ನು ಸಂಪರ್ಕಿಸುತ್ತಾರೆ. ಈ ಎಲ್ಲಾ ಪ್ರಕ್ರಿಯೆಗೆ 30 ದಿನ ಹಿಡಿಯುತ್ತದೆ. ಅಗತ್ಯ ದಾಖಲೆಗಳ ಸಲ್ಲಿಕೆಯಲ್ಲಿ ವ್ಯತ್ಯಾಸವಾದರೆ ಇ-ಖಾತಾ ಪ್ರಕ್ರಿಯೆ ವಿಳಂಬವಾಗುತ್ತದೆ.
-ಆನ್‌ಲೈನ್‌ ವ್ಯವಹಾರ ಸುಗಮವಾಗುತ್ತದೆ. ಬ್ಯಾಂಕ್‌ಗೆ ಹೋಗುವ ಸಮಯ ಉಳಿಸುವ, ಜಗಳ ತಪ್ಪಿಸುವ ಆನ್‌ಲೈನ್‌ ಬ್ಯಾಂಕಿಂಗ್‌ ಮಾದರಿಯಲ್ಲಿಇ ಖಾತೆ ಸಹಕಾರಿಯಾಗಿವೆ. 24/7 ಖಾತೆಯ ಮಾಹಿತಿ ಲಭ್ಯವಿರುತ್ತದೆ.
-ಆಸ್ತಿ ತೆರಿಗೆಯನ್ನು ಆನ್‌ಲೈನ್‌ನಲ್ಲಿ ಪಾವತಿಸಬಹುದು. ಇ-ಖಾತೆ ಬಳಕೆಗೆ ಆಸ್ತಿ ಗುರುತಿನ ಸಂಖ್ಯೆ (ಪಿಐಡಿ) ಅಗತ್ಯವಿರುತ್ತದೆ. ಬೆಂಗಳೂರಿನಲ್ಲಿ ಬಿಬಿಎಂಪಿ ಸುಪರ್ದಿಯಲ್ಲಿದ್ದ ಪ್ರತಿ ಆಸ್ತಿಗೆ ವಿಶೇಷ ಗುರುತಿನ ಸಂಖ್ಯೆ ನೀಡಲಾಗಿದೆ.
-2007ರಲ್ಲಿ ಬೆಂಗಳೂರು ಬಿಎಂಪಿಯು ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆಯಾಯಿತು. ಆ ನಂತರ ಹಲವು ಮುನ್ಸಿಪಲ್‌ ಕಾರ್ಪೊರೇಷನ್‌ ಮತ್ತು ಸ್ಯಾಟಲೈಟ್‌ ಟೌನ್‌ಗಳು ಬಿಬಿಎಂಪಿ ವ್ಯಾಪ್ತಿಗೆ ಬಂದವು. ಈ ಆಸ್ತಿಗಳು ಪಿಐಡಿ ಸಂಖ್ಯೆ ಹೊಂದಿಲ್ಲ. ಪಿಐಡಿ ಸಂಖ್ಯೆಗಾಗಿ ಸ್ಥಳೀಯ ಬಿಬಿಎಂಪಿ ವಾರ್ಡ್‌ ಕಚೇರಿಯನ್ನು ಸಂಪರ್ಕಿಸಬಹುದು. ಪ್ರತಿ ಆಸ್ತಿಗೆ ಪ್ರತ್ಯೇಕ ಐಡಿ ಇರುತ್ತದೆ.
-ಪಿಐಡಿ ಸಂಖ್ಯೆ ಆಧರಿಸಿ ಪ್ರತಿ ಆಸ್ತಿಯನ್ನು ಡಿಜಿಟಲ್‌ ವಿಳಾಸ ನೀಡಲು ಬಿಬಿಎಂಪಿ ಕೆಲಸ ಮಾಡುತ್ತಿದೆ. ಡಿಜಿ-7 ಎಂಬ ಅದ್ಬುತ ಯೋಜನೆಯಲ್ಲಿ ಪ್ರಾಧಿಕಾರ ಮತ್ತು ಕಿಯೋನಿಕ್ಸ್‌ ಒಟ್ಟಿಗೆ ಕೆಲಸ ಮಾಡಿದೆ.